دەستەی ژینگە 10 ڕۆژ مۆڵەت بە خاوەن مۆلیدەکان دەدات

ئاڤا نیوز

ئەو مۆلیدە ئەهلیانەی لە شوێنە گشتییەکان و هۆتێل و گەڕەکەکان دەبنە هۆی بێزارکردنی خەڵک و پیسکردنی ژینگە، دەستەی ژینگە بە کۆمەڵێک ڕێنمایی پابەندیان دەکات، لە ئەگەری سەرپێچیکردن بە پێبژاردن تاوەکو دوو ملیۆن دینار سزایان دەدات.

 

بۆچی گرنگە: پیسی هەوای هەولێر یەکێکە لەو پرسانەی بەردەوام نیگەرانی فراوانی خەڵکی لێدەکەوێتەوە، حکومەتیش هەڵمەتێکی فراوانی بۆ کەمکردنەوەی هۆکارەکانی پیسبوونی ژینگە گرتووەتە بەر، لەو چوارچێوەیەدا دەستەی ژینگە لیژنەیەکی بەدواداچوونی بۆ گلەیی هاووڵاتیان پێکهێناوە.

لێدوانی فەرمی: دڵشاد هیرانی، بەرپرسی دەستەی ژینگەی هەولێر بە ئاڤا نیوزی گوت: "هەر مۆلیدەیەکی گەڕەک و هۆتێل و شوێنە گشتییەکان سکاڵای خەڵکی لەسەر بێت، چاودێری و پشکنین بۆ دووکەڵ و ژاوەژاوەکەیان دەکەین، ئەگەر لە ستاندارد تێپەڕبێت دەبێت چارەسەری بکەن".

ئەوەی پێویستە بیزانیت: دەستەی ژینگە بۆ پێوانەی دەنگی مۆلیدەکان کار بە سیستەمی بی سیبڵ دەکات، دەبێت هەر مۆلیدەیەک دەنگەکەی لە نێوان 20 بۆ 90 پلە بێت، هەر مۆلیدەیەک ئەم ستاندارە تێپەڕێنێت، یاخود دووکەڵی زۆر بێت یان دیواری بۆ دروست نەکرابێت، سەرەتا ئاگادار دەکرێتەوە و 10 ڕۆ مۆڵەتی پێدەدرێت، ئەگەر چارەسەری نەکات ئەوا بە پێبژاردن سزا دەدرێت، سزاکە لە 300 هەزار دینارەوە دەستپێدەکات بۆ دوو ملیۆن دینار.

ژمارەکان وادەڵێن: لە مانگی حەوتی ئەمساڵەوە شەش مۆلیدە بەهۆی خراپی و کواڵیتی نزمەوە بە خاوەنەکانیان گۆڕداون، 40 مۆلیدەش بە هەمان هۆکار ئاگادارکراونەتەوە.