دادگەی فیدراڵی کۆتایی بە پەرلەمان هێنا و حکومەتی کردە کاربەڕێکەر

ئاڤا نیوز

ڕۆژی دووشەممە، دادگەی باڵای فیدراڵی بڕیارێکی گرنگی دەرکرد بۆ کۆتاییهێنان بە کارەکانی پەرلەمانی ئێستا و گۆڕینی حکومەت بۆ "حکومەتێکی کاربەڕێکەر" کە دەسەڵاتی بەشێوەیەکی سنووردار هەبێت، هاوکات ئەوەشی یەکلاییکردووەتەوە، سەرۆککۆمار بەبێ هیچ گۆڕانکارییەک بەردەوام دەبێت لە جێبەجێکردنی ئەرکە دەستوورییەکانی.

وێنە گەورەکە: دوای تێپەڕبوونی چوار ساڵ و کۆتاییهاتنی ماوەی دەستووریی پەرلەمان، لە 11ـی ئەم مانگە، هەڵبژاردنی خولی شەشەمی پەرلەمانی عێراق بەڕێوەچوو. دادگەی باڵای فیدراڵی بەهۆکاری ئەوەی تەمەنی یاسایی پەرلەمان و حکومەت تەواو بوو، بڕیاریدا کۆتایی بە هەردوو دەسەڵاتەکە بهێنێت.

نووسراوی فەرمی: دادگەی باڵای فیدراڵی عێراق بڕیاری دا، ڕۆژی هەڵبژاردنی گشتی بۆ پەرلەمانی نوێ ئاماژەیە بۆ کۆتاییهاتنی خولی پێشوو و دەسەڵاتەکانی لە یاسادانان و چاودێریکردنی کارەکانی حکومەت.

دادگەکە سەبارەت بە حکومەت ڕایگەیاند، دەسەڵاتەکانی ئەنجوومەنی وەزیران لە دەسەڵاتی تەواوەوە دەگۆڕدرێن بۆ دەسەڵاتی سنووردار لە بەڕێوەبردنی کاروباری ڕۆژانەدا وەکو؛ بڕیار و کاری بەپەلە کە ناتوانرێت دوابخرێن، ئەوانەش لەپێناو دڵنیابوون لە کارکردنی بەردەوام و بێ پچڕانی دامودەزگاکانی دەوڵەت.

گۆشەیەکی دیکەی دیمەنەکە: ئەوەی پەیوەستە بە سەرۆککۆمار وەکو بەشێک لە دەسەڵاتی جێبەجێکردن، دادگەکە دووپاتی کردەوە، سەرۆککۆمار لەکارەکانی بەردەوام دەبێت تاوەکو دانیشتنەکانی پەرلەمانی نوێ.

قووڵتر: بەپێی بڕیارەکە حکومەت دەسەڵاتی نابێت لە؛ واژۆکردنی پەیماننامە و ڕێککەوتنە نێودەوڵەتییەکان، بەستنی ئەو گرێبەستانەی کە کاریگەرییان لەسەر لایەنە سیاسی و ئابووری و کۆمەڵایەتییەکانی وڵات هەیە، پێشنیازکردنی ڕەشنووسی یاساکان، گرێبەستکردنی قەرز، دانان یان دەرکردنی بەرپرسان لە پۆستە باڵاکانی دەوڵەت، یان داڕشتنەوەی وەزارەت و دەستەکان.