بۆ گەیشتن بە مۆندیال هەڵبژاردەی عێراق لەبەردەم یارییەکی چارەنووسساز دایە

ئاڤا نیوز

سبەی سێشەممە، هەڵبژاردەی عێراق لە بەرامبەر دەرفەتێکی مێژوویی دایە کاتێک ڕووبەڕووی هەڵبژاردەی ئیماراتی عەرەبی دەبێتەوە لە پارێزگای بەسرە، بەم هۆیەوە پارێزگاری بەسرە بە فەرمی پشووی ڕاگەیاندووە بۆ پاڵپشتیکردنی هەڵبژاردەکە.

چیرۆکی سەرەکی: هەڵبژاردەی عێراق ڕۆژی سێشەممە کاتژمێر 07:00ـی ئێوارە لە یاریگەی "جزعی نەخلە"(داری خورما) ڕووبەڕووی هەڵبژاردەی ئیمارات دەبێتەوە لە یاریی گەڕانەوە لە یارییەکانی پاشکۆی پاڵاوتنەکانی جامی جیهانیی ساڵی 2026.

ڕاگەیێنراوی فەرمی: ئەسعەد عیدانی، پارێزگاری بەسرە لە ڕاگەیێنراوێکدا بڕیاری دا، سبەی سێشەممە دەوامی فەرمی لە پارێزگاکە ڕابگیرێت، بۆ ئەوەی دەرفەت بدرێت بە جەماوەر بۆ دەستەبەرکردنی کەشێکی گونجاو و پاڵپشتیکردن و هاندانی هەڵبژاردەی عێراق لە یارییە چارەنووسسازەکەیدا لە پاڵاوتنەکانی جامی جیهانی.

لەلایەکی دیکەوە: محەممەد شیاع سوودانی، سەرۆکوەزیرانی عێراق، لایەنە پەیوەندیدارەکانی ڕاسپاردووە ئاسانکاری بۆ هاتنی هاندەرانی ئیماراتی بۆ عێراق بکەن و پێشوازییەکی باشیان لێبکەن.

ئەوەی پێویستە بیزانیت: ڕۆژی پێنجشەممەی ڕابردوو، لە یاریی چوون هەردوو هەڵبژاردە لە یاریگەی ئیمارات ڕووبەڕووی یەکتربوونەوە و بە گۆڵێک بۆ هەردوولا کۆتاییهات.