كۆمیسیۆن وێنەی كاغەزەكانی دەنگدان دەداتەوە حیزب و بەربژێرە سەربەخۆكان

ئاڤا نیوز 

كۆمیسیۆنی باڵای سەربەخۆی هەڵبژاردنەكانی عێراق، لەڕێگەی نووسینگەكانیەوە كاغەزەكانی دەنگدان بە حیزب و هاوپەیمانی و كاندیدە سەربەخۆكان دەداتەوە.

وێنە گەورەکە: لەدوای ڕاگەیاندنی ئەنجامی بەرایی هەڵبژاردنی خولی شەشەمی پەرلەمانی کوردستان، ژمارەیەک لیست و بەربژێر گومانیان خستە سەر ئەنجامەکان و ڕایانگەیاند "ساختەکاری" کراوە و ئەو ئەنجامەی ڕاگەیێنراوە دەنگی ڕاستەقینەی ئەوان نییە.

لێدوانی فەرمی: نەبەرد عومەر، بەرپرسی دەستەی هەڵبژاردنەکانی هەرێمی کوردستان لە کۆمیسیۆن، لە كۆنفڕانسێكی ڕۆژنامەوانیدا ڕایگەیاند: "بۆ یەكەمجارە كۆمیسیۆن ئەم كارە دەكات، ئەمڕۆ یان سبەی وێنەی كاغەزەكانی دەنگدان دەدرێتەوە بە حیزب و هاوپەیمانی و بەربژێرە سەربەخۆكان، سەرجەمیان دەتوانن لەڕێگەی نووسینگەكانەوە ئەو وێنانە وەربگرنەوە".

لەلایەكی دیكەوە: نەبەرد عومەر ئاماژەی بۆ ئەوە کرد ئەو كاغەزانە هەم پووچەڵی تێدایە هەم دروست، هاوكات ئەو شریتەی كە ڕۆژی دەنگدان لە ئامێرەكان دەرهێنراوە و دراوە بە نوێنەری لایەنە سیاسییەكان، هەمان شریت دەدرێتەوە بە حیزب و هاوپەیمانی و كاندیدەكان، دەتوانن بەراوردی هەر سێ جۆر بەڵگە بكەن، یەكەمجارە پێش ئەوەی ئەنجامی كۆتایی ڕابگەیێنرێت، كۆمیسیۆن ئەو كارە بكات.

زانیاریی زیاتر: دوای ئەوەی ئەنجامی كۆتایی هەڵبژاردن لەلایەن كۆمسیۆنەوە ئاشكرا دەكرێت، جارێكی دیكە ڕێگە بە حیزب و هاوپەیمانی و بەربژێرە سەربەخۆكان دەدرێت لە بەرامبەر هەر تێبینییەك سكاڵا بكەن.