کۆمەڵی دادگەری: نەوەک هەر حکومەت، ڕەنگە نەچینە پەرلەمانیش

ئاڤا نیوز

کۆمەڵی دادگەری کوردستان پەیامێک لەبارەی ئەنجامی بەرایی هەڵبژاردن و بەشداریکردنیان لە حکومەت بڵاودەکاتەوە و ڕایدەگەیێنێت، بەهۆی "ساختەکاری جۆری و ڕێکخراو" ئەنجامەکان ڕەت دەکەنەوە، نەوەک بەشداریکردن لە حکومەت، لە گفتوگۆدان نەچنە پەرلەمانیش. جەختیش دەکاتەوە لە کۆمیسیۆن و دادگەی فیدراڵی سکاڵا تۆمار دەکەن.

وێنە گەورەکە: دوای ڕاگەیاندنی ئەنجامە بەراییەکانی هەڵبژاردنی خولی شەشەمی پەرلەمانی کوردستان، ژمارەیەک لایەنی سیاسی و بەربژێری سەربەخۆ ناڕەزایەتییان دەربڕی و ڕایانگەیاند ساختەکاری کراوە، یەکێک لەوان کۆمەڵی دادگەری بوو.

چیرۆکی سەرەکی: کۆمەڵی دادگەری لە هەڵبژاردنی ئەمجارە بەراورد بە هەڵبژاردنی ساڵی 2018، چوار کورسی کەمی کرد و لە حەوت کورسییەوە بۆ سێ کورسی دابەزی، وەک خۆیان دەڵێن "ئەم ئەنجامە جێگەی سەرسوڕمان و باوەڕنەکراوە، نەک سەرکردایەتی و ئەندامانی کۆمەڵ، بەڵکو لە دەرەوەی کۆمەڵیش دەنگەکانی کۆمەڵ بەوڕێژە کەمییە، جێگەی باوەڕ نین".

ڕاگەیێنراوی فەرمی: ئەنجوومەنی باڵای کۆمەڵی دادگەری ڕایدەگەیێنێت، ئەگەرچی بەهۆی گۆڕانکاری لە یاسای هەڵبژاردن و سەرپەرشتیکردنی پرۆسەکە لەلایەن کۆمیسیۆنی باڵای سەربەخۆی هەڵبژاردنەکانی حێراق هیوایان هەڵچنیوە ساختەکاری کەمبێتەوە و بەڵام "بەداخەوە وادەرنەچوو، نەک ڕێگری لە ساختەکاری نەکرا، بەڵکو ساختەکارییەکان جۆری و ڕێکخراو بوون، بەشێوەیەک هەموو کەس درکی پێنەکات".

زانیاریی زیاتر: لە ڕاگەیێنراوەکەدا جەخت کراوەتەوە: "دوای بەدواداچوون و گەیشتن بە زانیارییەکان، گەیشتینە ئەو ڕاستییەی بەمەبەست و بەرنامە بۆ داڕێژراو دەنگی کۆمەڵ پووچەڵ کراوە، یان هەژمار کراوە بۆ لایەنی تر، ئەم ساختەکارییە لای ئێمە قبووڵ کراو نییە و هەڵوێستی جددیمان دەبێ و سکاڵا دەکەین لە کۆمیسیۆن و دادگای فدراڵی".

 

کاریگەری و لێکەوتەکان: بەم هۆیەوە کۆمەڵی دادگەری ڕایدەگەیێنێ،  نەک لە حکومەت بەشدار نابن، بەڵکو لە ڕاوێژ و باس و خواسی ئەوە دان لە "پەرلەمانێکی دیزاین کراو کە پێکهاتەکەی بەدەرە لە خواستی هاووڵاتیان"، بەشداری نەکەن.