بەراورد بە ڕابردوو لەم هەڵبژاردنە ژمارەی سكاڵاكان كەمتر بوون

ئاڤا نیوز 

 

بەراورد بە هەڵبژاردنەكانی ڕابردوو، لە هەڵبژاردنی ئەمجارەی پەرلەمانی كوردستان ژمارەی سكاڵای لایەنە سیاسییەكان و چاودێران كەمتر بوون و بەرپرسێكی كۆمیسیۆنی هەڵبژاردنیش هۆكارەكەی ئاشكرا دەكات.

 

وێنە گەورەكە: ڕۆژی 20-10-2024، هەڵبژاردنی خولی شەشەمی پەرلەمانی كوردستان بەڕێوەچوو و كۆمیسیۆن 24 كاتژمێر دوای تەواوبوونی پرۆسەكە،  ڕێژەی 99.63%ی ئەنجامەكانی ئاشكرا كرد.

 

لێدوانی فەرمی: خالید عەباس، بەرپرسی نووسینگەی دهۆكی كۆمیسیۆنی هەڵبژاردن بە ئاڤا نیوزی ڕاگەیاند: بەراورد بە هەڵبژاردنی ساڵی 2018ی پەرلەمانی كوردستان و هەڵبژاردنی ساڵی 2021ی پەرلەمانی عێراق ژمارەی سكاڵاكان كەمتربوونەتەوە، ئەمەش هۆكارەكەی بۆ ڕێككارانە دەگەڕێتەوە كە كۆمیسیۆن لە هەڵبژاردنی ئەمجارە گرتوویەتیە بەر، هاوكات پابەندیی کاندیدان و لایەنەکان بە ڕێنماییەكانەوە هۆكارێكی دیكەیە.

 

زانیاریی زیاتر: لە هەڵبژاردنی ئەمجارەی پەرلەمانی كوردستان لە هەر چوار بازنەكەی هەڵبژاردن 189 سكاڵا لەلایەن لایەنە سیاسییەكان و کاندیدە سەربەخۆكانەوە تۆمار كراون، بەراورد بە ژمارەی سكاڵاكانی هەڵبژاردنی ڕابردوو نیو هێندە كەمی كردووە.

 

ئەوەش بزانە: ئەگەر پارێزگای دهۆك وەك نموونە لە بەراوردكردنی ژمارەی سكاڵاكان وەربگیرێت ژمارەكان بەمشێوەیەن، لە هەڵبژاردنی ئەمجارە 37 سكاڵا تۆمار كراون، لە هەڵبژاردنی ساڵی 2018ی پەرلەمانی كوردستان 78 سكاڵا تۆمار كرابوون.