وەزارەتی پەروەردە قوتابییانی دابڕاو دەگەڕێنێتەوە بۆ خوێندن

ئاڤا نیوز

 

وەزارەتی پەروەردەی حكومەتی هەرێمی كوردستان بەهەماهەنگی لەگەڵ ڕێكخراوی یونسێف، هەوڵ بۆ گەڕاندنەوەی ئەو قوتابیانە دەدات كە لە خوێندن دابڕاون.

 

زانیاریی بەدەستهاتوو: تیمە هاوبەشەكانی وەزارەتی پەروەردە و ڕێكخراوی یونسێف، لە شار و شارۆچكەكانی هەرێمی کوردستان دەستیان بە هەڵمەتی گەڕان و تۆماركردنی ناوی ئەو كەسانە كردووە كە لە خوێندن دابڕاون، یاخود هەرگیز نەچوونەتە بەر خوێندن بۆ ئەوەی جارێكی دیكە بە شێوازی جۆراوجۆر بیانگەڕێننەوە بەر خوێندن.

 

لێدوانی فەرمی: ئالان حەمە سەعید، وەزیری پەروەردی هەرێمی کوردستان ڕایگەیاند: "ئامانج لە هەڵمەتەکە پێدانی دەرفەتێکی دیکەیە بە منداڵان و گەنجانی لە خوێندن دابڕاو یاخود ئەم منداڵانەی کە هەرگیز نەچوونەتە بەر خوێندن، بۆ ئەوەی جارێکی دیکە لە ڕێگەی خوێندنی ئاسایی، نائاسایی، خوێندنی ئۆنڵاین و خوێندنی دەرەکی بتوانن دەستیان بە خوێندن بگات و دووبارە بەردەوامی بە خوێندنیان بدەن.

 

زانیاریی زیاتر: هەڵمەتەكە ناوی "گەڕانەوە بۆ فێربوون"ـە و لە سەرەتای ئەم مانگەوە دەستی پێكردووە، بڕیارە 40 ڕۆژ بخایەنێت.

 

ئەوەی پێویستە بیزانیت: بەپێی ئامارەكانی وەزارەتی پەروەردەی حكومەتی هەرێمی كوردستان، ساڵی 2018 ڕێژەی نەخوێندەواری لە هەرێمی كوردستان %24 بووە بەڵام ئەمساڵ ڕێژەكە بۆ %16 دابەزیوە.