ئەنجامی ژماردنی دەستی و ئەلیکترۆنی دەنگەکان یەکلا دەکرێتەوە

ئاڤا نیوز

 

کۆمیسیۆنی باڵای هەڵبژاردنەکان ئەنجامی ژماردنی دەستیی بۆ دەنگی بۆ ئەو سندوقانەی کە کێشەیان لەسەر بوو بڵاو کردەوە. کۆمیسیۆن دەڵێت: ژماردنی دەستیی و ئەلیکترۆنی وەک یەکن.

 

لێدوانی فەرمی: نەبەرد عومەر، بەڕێوەبەرى دەستەى هەڵبژاردنەکانى هەرێمى کوردستان بە ئاڤا نیوزی ڕاگەیاند: "ژماردنی دەستیی بۆ ئەو سندوقانە کراوە کە کێشەیان لەسەر بووە، بەڵام ئەنجامەکان هاوشێوەی ئەو ئەنجامە بووە کە سیستمی ئەلیکترۆنی سندووقەکە ئاشکرایکردووە".

 

زانیاریی زیاتر: لەبارەی تانەدان لە ئەنجامەکان نەبەر عومەر گوتی، "ئەو حیزب و هاوپەیمانێتی و کاندیدانەی گومانیان لە ئەنجامەکان هەیە، هەرکاتێک کۆمیسیۆنى هەڵبژاردنەکان ئەنجامى کۆتایی پرۆسەى هەڵبژاردنى خولى شەشەمى پەرلەمانى کوردستانى ڕاگەیاند، ئەو لایەنانەش دەتوانن لەماوەى سێ رۆژدا تانە لە ئەنجامەکانى پرۆسەکە بدەن".

 

باکگراوند: رۆژى 20ـی ئەم مانگە هەڵبژاردنى خولى شەشەمى پەرلەمانى کوردستان ئەنجامدرا و ڕۆژى دواتر ئەنجامى بەرایی پرۆسەى هەڵبژاردن راگەیەندرا کە تیایدا پارتی زۆرینەی دەنگەکانی بەدەستهێنا و لە پلەی یەکەم دێت و دوای ئەویش یەکێتی و نەوەی نوێ پلەی دووەم و سێیەمان بەدەستهێنا، بڕیاریشە لە داهاتوودا کۆمیسیۆن ئەنجامی کۆتایی ڕابگەیێنێت.