فەرمانبەرانی خاوەن "هەژماری من" دەتوانن بە نرخی بانکی ناوەندی دۆلار وەربگرن

ئاڤا نیوز

 

بڕیارە لەم هەفتەیەدا لە فڕۆکەخانەی نێودەوڵەتیی هەولێر گەشتیاران دۆلار بە نرخی بانکی ناوەندی وەربگرن، لە ئایندەیەکی نزیکدا لە فڕۆکەخانەی سلێمانیش هەمان ڕێکار دەستپێبکات و ئەو فەرمانبەرانەی لە پڕۆژەی "هەژماری من" بەشدارن، دەتوانن سوودمەندبن لەو خزمەتگوزارییەدا.

زانیاریی بەدەستهاتوو: بەگوێرەی بەدواداچوونی ئاڤا نیوز ئەو فەرمانبەرانەی لە پڕۆژەی "هەژماری من" بەشدارن و نیازی گەشتیان هەیە، دەتوانن ڕاستەوخۆ پارەکە بگوازنەوە بۆ ئەو دوو بانکەی دیاریکراوە کە هەریەکە لە بانکەکانی TBI و جیهانە، ئەمەش وەک ئاسانکاری بۆ ئەوانەیە کە بەشدارن لەو خزمەتگوزارییە.

ئەوەی پێویستە بیزانیت: لە بانکی TBI ڕێنماییەکانی پێدانی دۆلار بە نرخی بانکی ناوەندی بەمشێوەیە خراوەتە ڕوو، ئەو کەسەی گەشت دەکات سێ ڕۆژ پێش گەشتەکەی پارەکە لە بانک دابنێت و نابێت گەشتیار تەمەنی لە 18 ساڵ کەمتر بێت، ئەو کاتەی گەشت دەکات لەکاتی دەرچوونی لە خاڵی پشکنین دۆلارەکەی پێ دەدرێت.

 

باکگراوند:  لە مانگی تەمموزی ئەمساڵ بانکی ناوەندی بڕیاریدا پێدانی دۆلار بە گەشتیاران لە هەموو فڕۆکەخانەکانی عێراق دەستپێبکاتەوە، بەڵام دوای دوو مانگ هێشتا لە فرۆکەخانەکانی هەولێر و سلێمانی ئەم پرۆسەیە دەستیپێنەکردووەتەوە، بەپێی بڕیارێکی بانکی ناوەندیی عێراق، هەموو ئەو کەسانەی گەشت دەکەن بۆیان هەیە دۆلار بەنرخی بانکی ناوەندی وەربگرن، بۆ هەر 100 دۆلار، 132 هەزار دینارە.