گرووپێک بەرپرسیارێتی هێرشەکەی سەر بنکەی ئەمریکا لە سووریا لەئەستۆ دەگرێت

ئاڤا نیوز

 

گرووپی "الثوریون- شۆڕشگێڕەکان" کە خۆی وەک گرووپێکی سەر بە بەرەی مقاوەمەی ئیسلامی لە عێراق ناو دەبات، بەرپرسیارێتی خۆی لە هێرشەکەی درەنگانی شەوی ڕابردووی سەر بنکەی تەنەفی هێزەکانی ئەمریکا لە سێگۆشەی سنووریی عێراق، سووریا و ئوردن، ڕادەگەیێنێت.

 

چیرۆکی سەرەکی: درەنگانی شەوی ڕابردوو لە ڕێگەی ژمارەیەک مووشەک و فڕۆکەی بێ فڕۆکەوانەوە زنجیرەیەک هێرش کرایە سەر بنکەی تەنەفی هێزەکانی ئەمریکا، لە سووریا.

 

زانیاریی بەدەستهاتوو: گرووپێک بەناوی مقاوەمەی ئیسلامی لە عێراق "شۆڕشگێڕان" لە ڕاگەیێنراوێکدا، ئاماژە بۆ ئەوە دەکات کە بنکەی تەنەفی سەر بە هێزەکانی ئەمریکایان لە ڕێگەی ژمارەیەک مووشەک و فڕۆکەی بێفڕۆکەوانەوە لە سووریا کردووەتە ئامانج و ئاماژە بۆ ئەوەش دەکات لە هێرشەکانیان بەردەوام دەبن تاوەکو یەک سەربازی ئەمریکی لەسەر خاکی عێراق مابێت.

 

ئەوەی لەوبارەیەوە دەگوترێت: ڕوانگەی سووری بۆ مافەکانی مرۆڤ بڵاویکردەوە، هێزی هاوپەیمانی نێودەوڵەتیی بەشێک لەو فڕۆکە بێ فڕۆکەوانانەی خستووەتەخوارەوە کە ئاڕاستەی بنکەکە کرابوون، جەختیش دەکاتەوە کە ئەو هێرشانە لەلایەن گرووپە چەکدارییەکانی هاوپەیمانی ئێران لە عێراقەوە ئاڕاستەی بنکەکە کراون.

 

ژمارەکان وادەڵێن: بەگوێرەی ئامارەکانی ڕوانگەی سووری لە 19ی تشرینی یەکەمی ساڵی ڕابردووەوە، 151 جار هێرشکراوەتەسەر بنکەکانی هاوپەیمانی نێودەوڵەتی دژی داعش لە سووریاو ڕۆژئاوای کوردستان.