ئەمینداری نوێی حیزبوڵڵای لوبنان یەکەم پەیامی ڕادەگەیێنێت

ئاڤا نیوز

نەعیم قاسم، ئەمینداری نوێی حیزبوڵڵای لوبنان وتارێک پێشکەش دەکات و یەکەم پەیامی ڕادەگەیێنێت.

وێنە گەورەکە: دوای مانگێک لە کوژرانی حەسەن نەسروڵڵا، ئەمینداری گشتیی حیزبوڵڵای لوبنان، ئەنجوومەنی شورای حیزبوڵڵا نەعیم قاسم، جێگری نەسروڵڵای وەک ئەمینداریی نوێ و کەسی یەکەمی حیزبەکە هەڵبژارد.
 
زانیاریی بەدەستهاتوو: سەرچاوەیەکی نزیک لە حیزبوڵڵا ڕایگەیاندووە، ئەمڕۆ چوارشەممە نەعیم قاسم یەکەم وتاری خۆی پێشکەش دەکات. هەرچەندە زانیاریی زیاتری باس نەکردووە، بەڵام پیدەچێت وتارەکەی لەڕێگەی ڤیدیۆیەکی تۆمارکراو بڵاوبکاتەوە.

باکگراوند: لە 27-9-2024 حەسەن نەسروڵڵا، ئەمینداری گشتیی حیزبوڵڵایی لوبنان لە دەوروبەری بەیرووت لەلایەن هێزەکانی ئیسرائیلەوە کوژرا.
 
ئەمەش بزانە: ناوی تەواوی محەممەد نەعیم قاسمە، لە ساڵی 1953 لە بەیرووتی پایتەختی لوبنان لەدایک بووە، پێشتر جێگری حەسەن نەسڕوڵڵا، ئەمینداری گشتیی حیزبوڵڵا بوو.