وەزارەتی ناوخۆ چەند بڕیارێك سەبارەت بە فرۆشتنی سیمكارت دەدات

ئاڤا نیوز 

 

وەزارەتی ناوخۆ بە گفتوگۆ لەگەڵ وەزارەتی گواستنەوە و گەیاندن چەند بڕیارێك سەبارەت بە فرۆشتنی سیمكارت لە هەرێمی كوردستان دەردەكات.

 

وێنە گەورەكە: ڕۆژی پێنجشەممە 31-10-2024، كۆبوونەوەیەك لەنێوان هەردوو وەزارەتی ناوخۆ و گواستنەوە و گەیاندن و بەرێوەبەرایەتیی كاروباری ناوخۆی پارێزگای هەولێر و نوێنەری هەر حەوت كۆمپانیای مۆبایل و ئینتەرنێت كە لە هەرێمی كوردستان هەن، سەبارەت بە فرۆشتنی سیمكارت بەڕێوەچوو.

 

ڕاگەیێنراوی فەرمی: بەپێی ڕاگەیێنراوی وەزارەتی ناوخۆ لەمیانەی كۆبوونەوەكەدا چەند بڕیارێك دراون لەوانە، لەلایەن لیژنەی تایبەتمەندەوە لە سەرجەم پارێزگا و ئیدارە سەربەخۆكان چاودێریی بازاڕ بكرێت، دەست بەسەر سەرجەم ئەو سیمكاراتانەدا بگیرێت كە لەدەرەوەی ڕێوشوێنی یاساییەوە دەفرۆشرێن، سیمكارتە دەستبەسەرداگیراوەكانیش بە نووسراو ڕەوانەی وەزارەتی ناوخۆ بكرێن.

 

زانیاریی زیاتر: دەبێت دوای 48 كاتژمێر لە دەستبەسەرداگرتنیان، كۆمپانیاكان زانیاریی تەواو سەبارەت بە شوێنی چالاككردنی سیمكارتە دەستبەسەرداگیراوەكان و بریكاری سەرپێچیكار بدەن بە وەزارەتی ناوخۆ .

 

ئەوەش بزانە: وەزارەتی ناوخۆ بەپێی ڕێنمایی ژمارە (8)ی ساڵی 2021ی هەمواركراو شوێنی فرۆشتن و بریكاری سەرپێچیكار دادەخات و سزای دارایی دەدات، دواتر لەڕێگەی وەزارەتی گواستنەوە و گەیاندن و كۆمپانیاكەوە بریكاردارێتیی لە شوێنەکە دەسەندرێتەوە.

 

لەلایەكی دیكەوە: بەپێی بڕیارەكانی ئەمڕۆی وەزارەتی ناوخۆ، دەبێت كۆمپانیاكان بریكارە سەرەكی و لاوەكییەکان ناچار بكەن كە فۆرمی ئەلیكترۆنی خۆتۆماركردن پڕبكەنەوە و ماوەی مانگێكیان پێ بدەن، دوای ئەوە ئەگەر پابەند نەبوون، دەبێت بریكاردارێتیی فرۆشتنی سیمكارت لە بریكارەكە بسەندرێتەوە.