ڕێکخراوەکان داوای تێپەڕاندنی پرۆژەیاسای گەڕانەوەی موڵک بۆ خاوەنەکانیان دەکەن

ئاڤا نیوز

 

ڕێکخراوەکانی کۆمەڵگەی مەدەنی لە کەرکووک پاڵپشتی خۆیان بۆ هەوڵەکانی تێپەڕاندنی پرۆژەیاسای هەڵوەشاندنەوەی بڕیارەکانی ئەنجوومەنی سەرکردایەتی شۆڕشی هەڵوەشاوە دەردەبڕن و نیگەرانی خۆشیان پیشان دەدەن لەو هەوڵانەی وەک بەربەستێک دەخرێتە پێش تێپەڕاندنی ئەو پرۆژە یاسایە.

 

وێنە گەورەکە: ئەگەرچی شەش جار دەنگدان لەسەر پرۆژەیاسای گەڕانەوەی موڵک بۆ خاوەنەکانیان لە ڕێگەی هەڵوەشاندنەوەی بڕیارەکانی ئەنجومەنی سەرکردایەتی شۆڕش لە سەردەمی بەعس خراوتە کارنامەی دانیشتنەکانی پەرلەمان، بەڵام هەموو جارێک بەهۆی ناڕەزایەتی لایەنە سوننەکان ئەو بڕگەیە لە دانیشتنەکان لادراوە.

 

بۆچی گرنگە: لە ڕێگەی ئەو پرۆژەیاسایەوە کە تایبەتە بە کەرکووک و سنووری ماددەی 140، زیاتر لە 300 هەزار دۆنم مووڵک و زەوی جووتیارانی کورد و تورکمان کە 50 ساڵ پێش ئێستا لەلایەن ڕژێمی بەعسەوە دراون بە عەرەبی هاوردە، بۆ خاوەنە ڕەسەنەکانیان دەگەڕێتەوە.

 

لێدوانی فەرمی: ڕێکان فەرەیدوون، بەناوی چالاکوانان و ڕێکخراوەکانی کۆمەڵگەی مەدەنی لە کۆنگرەیەکی ڕۆژنامەوانیدا ڕایگەیاند: "وەکو ڕێکخراو و چالاکوانە مەدەنییەکانی شاری کەرکووک لە سۆنگەی پەرۆشیمان بۆ سیستمی دیموکراسی و گەڕانەوەی زەوییە زەوتکراوەکان، بە پێویستمان زانی پاڵپشتی خۆمان دەرببڕین بۆ هەوڵەکانی تێپەڕاندنی هەڵوەشاندنەوەی بڕیارەکانی ئەنجوومەنی سەرکردایەتی شۆڕش".

 

ئەوەی ئێستا ڕوودەدات: ڕێکخراوەکانی کۆمەڵگەی مەدەنی نیگەرانی خۆیان دەربڕی سەبارەت بە "هەوڵەکانی بەربەست خستنە بەردەم هەڵوەشانەوەی بڕیارەکە، بەداخەوە سەرەڕای بوونی ڕێککەوتن، بە شێوازی ناشارستانی کێشەی بۆ دروست دەکرێت".

 

شێوازی جێبەجێكردن: ئەو ڕێکخراوانە داوا دەکەن هەڵوەشاندنەوەی ئەو بڕیارە بە زۆرینەی ڕەها لە پەرلەمانی عێراق بە بەشداری کورد و تورکمان و عەرەب بێت، پێیانوایە هەڵوەشاندنەوەی ئەو بڕیارانە لە سوودی هاونیشتمانیانی عێراق و بە تایبەت لە ناوچە کوردستانییەکانی دەرەوە دەبێت، بە پێویستیشی دەزانن بە زووترین کات تێپەڕێنرێت.