بە ڕزگار بڵێ؛ سەگ پەلاماری منداڵێک دەدات و بەهۆیەوە گیان لەدەست دەدات

ئاڤا نیوز

 

لە گوندی پیرداوودی سەر بە شارەدێی شەمامک لە پارێزگای هەولێر، نزیکەی 20 سەگی بێلانە پەلاماری کچێکی تەمەن 11 ساڵان دەدەن، کچەکە هەر لەوێ گیان لە دەست دەدا. ڕزگار کۆچەر بەدواداچوون بۆ ڕووداوەکە دەکات و دەچێتە ماڵی کچەکە.

 

وێنە گەورەکە: بە ڕزگار بڵێ؛ یەکێک لە بەرنامەکانی وەرزی نوێی ئاڤا میدیایە و بەدواداچوون بۆ  کێشەی هاووڵاتییان دەکات. بەرنامەکە لەلایەن ڕزگار کۆچەرەوە پێشکەش دەکرێت و ئەمجارە بەدواداچوون بۆ ڕووداوی پەلاماردانی کچێک دەکات کە لەلایەن ڕەوە سەگێکی بێلانە بریندار دەکرێ و دواتر گیان لە دەست دەدات.

 

لێدوانی فەرمی: باوکی کچەکە بۆ مایکی ئاڤا گوتی: کچەکەم بەر لەوەی لەلایەن ڕەوە سەگەکەوە پەلامار بدرێ کە نزیکەی 20 سەگی بێلانە بوون، من لەناو کێڵگە لەسەر کار بووم، ئەویشم لەگەڵ بوو، بەڵام ئەو ماندوو و هیلاک بوو، بۆ پشوو بە تەنیا گەڕایەوە ماڵەوە، بەڵام بەرلەوەی بگاتەوە ماڵەوە سەگەکان پەلاماریان دا و پارچە پارچەیان کرد.

 

باوکی کچەکە دەڵێ، کاتێک گەیشتمە سەری، بەهۆی برینەکەیەوە تووشی شۆک بووم و نەمتوانی سەیری بکەم.

 

زانیاریی زیاتر: ئەو کچەی کە بەهۆی پەلاماردانی سەگی بێلانە گیانی لە دەست دا، لە خانەوادەیەکی عەرەبن وماوەی حەوت ساڵە بۆ کارکردن ماڵیان هاتووەتە ئەو گوندە.