تەم دووبارە فڕۆکەخانەکانی عێراقی پەکخست و گەشتەکانی ڕاگرت

ئاڤا نیوز

ئەمڕۆ دووشەممە، گەشتەکانی فڕۆکەخانەی نێودەوڵەتیی بەغدا دووبارە ڕاگیران، بەهۆی بەردەوامبوونی شەپۆلی تەمێکی چڕ کە ژمارەیەک لە شارەکانی عێراقی گرتووەتەوە، لەوانەش بەغدا. ئەمەش بووە هۆی کەمبوونەوەی ڕوونی ئاسۆیی و پەکخستنی جووڵەی هاتووچۆی ئاسمانی.

ئەوەی پێویستە بیزانیت: فڕۆکەخانەکانی عێراق لە چەند ڕۆژی ڕابردوودا بەهۆی تەمەوە چەندین جار ڕاگیران، ئەمەش بووە هۆی دواخستن و تێکچوونی خشتەی گەشتەکان لە فڕۆکەخانەکانی بەغدا و بەسرە.

زانیاریی بەدەستهاتوو: سەرچاوەیەکی ئاگادار بە میدیای عێراقی ڕاگەیاند، دۆخی ئێستای کەشوهەوا بووەتە هۆی ڕاگرتنی کاتیی گەشتەکان لە فڕۆکەخانەی بەغدا.

ئەوەی لەبارەیەوە دەگوترێت: پێشتر دەستەی کەشناسی عێراق هۆشداری دابوو لەوەی وڵاتەکە تووشی دۆخێکی کەشوهەوای گۆڕاو و دەگمەن دەبێتەوە، کە لە ڕۆژی دووشەممەوە تا کۆتایی هەفتە بەردەوام دەبێت، لەگەڵ ئەگەری بارانبارینی جیاواز لە ڕاددەی بەهێزییەوە کە لە ڕۆژئاوا و باشووری وڵات چڕ دەبێتەوە.

لەهەمان کاتدا: بەڕێوەبەرایەتییەکانی بەرگریی شارستانی لە چەند پارێزگایەکدا، لە کاتژمێرەکانی سەرەتای بەیانییەوە دەستیان بە بڵاوکردنەوەی تیمەکانی فریاگوزاری و ئۆتۆمبێلەکانی وەڵامدانەوەی خێرا کردووە لە شوێنە گرنگەکان و ڕێگا سەرەکییەکان، وەک ئامادەکارییەک بۆ ڕوودانی هەر ڕووداوێک کە بەهۆی چڕیی تەمەوە دروست بێت.