بەریتانیا ڕاستەوخۆ لە عێراقەوە ڕووبەڕووی قاچاخچییەکانی کۆچبەران دەبێتەوە

ئاڤا نیوز 

 

بڕیارە بەمزووانە بەریتانیا ژمارەیەک ئەفسەری وڵاتەکەی بنێرێتە عێراق بۆ دۆزینەوە و ڕووبەڕووبوونەوەی باندی بەقاچاخبردنی مرۆڤ و ئەو گرووپانەی هانی خەڵک دەدەن بۆ ڕێگە و کۆچی نایاسایی، "بەشێک لەو گرووپانەش لە هەرێمی کوردستانن".

 

بڵاوکراوەی فەرمی: ڕۆژنامه‌ی زه‌ ناشیوناڵـی به‌ریتانی، لە ڕاپۆرتێکدا ئاماژەی بەوە کردووە، کیر ستارمەر، سەرۆکوەزیرانی بەریتانیا، زیاتر لە 97 ملیۆن دۆلاری بۆ فەرماندەیی ئاسایشی سنوورەکانی ناسراو بە  (BSC) تەرخانکردووە، ئەمەش بە مەبەستی پاراستنی ئاسایشی سنوور و ڕێگریکردن لە هاتنی کۆچبەران بە نایاسایی.

 

زانیاریی زیاتر: بەشێک لەو پارەیەی بەریتانیا بۆ فەرماندەی ئاسایشی سنوورەکانی تەرخانکردووە، دەخرێتە خزمەتی ئەو ئەفسەرانەی بەریتانیا کە بڕیارە بێنە عێراق بۆ کارکردن و دیاریکردنی گرووپەکانی قاچاخچییەتی و دەستگیرکردنیان.

 

ئەمەش بزانە: تۆڕی ئەو گرووپانەی کە بەریتانیا دەستنیشانی کردوون لە کابولەوە تاوەکو هەرێمی کوردستان درێژ دەبنەوە، بەرپرسانی بەریتانیا پێیانوایە، بەشێک لەو گرووپانەی بەنایاسایی کۆچبەران لە عێراقەوە بۆ وڵاتەکەیان دەگوازنەوە، دەکەونە هەرێمی کوردستان.

 

ژمارەکان وادەڵێن: بەپێی ئامارەکانی حکومەتی بەریتانیا، لەماوەی ئەمساڵدا 31 هەزار و 94 کەس بە ڕێگەی نایاسایی کەناڵی ئینگلیزیان تێپەڕاندووە، ئەمەش بەراورد بە ساڵی ڕابردوو ڕێژەکە بە 16٪ زیاد کردووە.