سەرکەوتنی ترەمپ پێچەوانەی ڕاپرسییەکان بوو

ئاڤا نیوز

 

دوای کۆتاییهاتنی هەڵبژاردنی سەرۆکایەتیی ئەمریکا، دۆناڵد ترەمپ لە فلۆریدا گوتاری سەرکەوتنی بەسەر کامالا هاریسی ڕکابەری پێشکەش کرد.

 

چیڕۆکی سەرەکی: لەگەل دەستپێکردنی هەڵمەتی هەڵبژاردن بۆ سەرۆکایەتیی ئەمریکا، ژمارەیەکی زۆری ڕاپرسی پێشبینی براوەی هەڵبژاردنیان دەکرد لە نێوان هەردوو کاندیدی سەرەکی، دۆناڵد ترەمپ و کامالا هاریس بەجۆرێک لە زۆرینەی ڕاپرسییەکان هاریس لە پێش ترەمپەوە بوو.

ئەوەی پێویستە بیزانیت: ڕاپرسییەکان لەلایەن دەزگا میدیا بەناوبانگەکانەوە کرا بوو و زۆرینەیان پێشبینیان دەکرد کامالا بگاتەوە کۆشکی سپی، بەڵام ئەمجارە وەک سەرۆکی ئەمریکا؛ ڕاپرسییەکانیش پێش هەڵبژاردنی سەرۆکی ئەمریکا بەمجۆرە بوون: 

کاناڵی بی بی سی: کامالا هاریس  %48،  دۆناڵد ترەمپ %47.

ماڵپەڕی فایڤ سێرتی ئەیت: کامالا هاریس %48،  دۆناڵد ترەمپ %46.

ئاژانسی هەواڵی ئەی بی سی: کامالا هاریس %48  دۆناڵد ترەمپ %45.

دەزگای نیشتیمانیی هەڵبژاردن : کامالا هاریس %50،  دۆناڵد ترەمپ %49.

فۆکس نیوز: دۆناڵد ترەمپ %50، کامالا هاریس  %48.

 

زانیاریی زیاتر: بەرەبەیانی ئەمڕۆ بە کاتی کوردستان ئەنجامی بەرایی هەڵبژاردنی سەرۆکایەتیی ئەمریکا لە میدیاکانی ئەمریکا بڵاوکرایەوە و کە ترەمپ بە بەدەستهێنانی 277 ئەندامی دەستەی هەڵبژاردن لەبەرامبەر 224 ئەندامی دەستەی هەڵبژاردن بۆ کامالا، بووە سەرۆکی ئەمریکا.