عەبدوڵڵا کوێخا موبارەک: کارەکانی پڕۆژەی ئاوی گۆپتەپە – چەمچەماڵ ڕادەگیرێت

ئاڤا نیوز

 

ماوەی سێ مانگە دەستکراوە بە کارکردن لە پرۆژەی ئاوی گوپتەپە – چەمچەماڵ، تاوەکو ئێستا کۆمپانیای جێبەجێکار شایستە داراییەکانی بۆ خەرجنەکراوە.

 

وێنە گەورەکە: وەکو ئێستا شایستەی دارایی کۆمپانیای جێبەجێکاری پرۆژەی ئاوی گوپتەپە – چەمچەماڵ خەرجنەکراوە و عەبدوڵڵای کوێخا موبارەکیش باسی لایەنێک دەکات کە ڕێگرە لەوەی پارەکە خەرج بکرێت.

 

لێدوانی فەرمی: عەبدوڵڵای کوێخا موبارەک، لە تۆڕی کۆمەڵایەتیی فەیسبووک ڕایگەیاند: پرۆژەی ئاوی گۆپتەپە -چەمچەماڵ ڕادەگیرێت، کۆمپانیاکە تاوەکو ئێستا کاری باشی کردووە، بەڵام تا ئێستا ھیچ پارەیەکی پێنەدراوە، بەرپرسێکی باڵا و لایەنێک ڕێگرن لە پێدانی پارەی کۆمپانیاکە، وتراوە چەمچەماڵ شایەنی ئەو پارە زۆرە نییە بۆی خەرج بکرێت".

 

ئەمەش بزانە: عەبدوڵڵای کوێخا دەشڵێت: بەم زووانە بە وردی ڕوونی دەکەینەوە کە چەمچەماڵ داهاتی چەندە لە پارێزگای سلێمانی، بۆ ئەوانەی کە پێیان وایە چەمچەماڵ شایەنی پرۆژەیەکی وەھا نییە، بە خەڵکی چەمچەماڵیش دەڵێین کێ و کام لایەن ھۆکاری ڕاگرتن و پەکخستنی پرۆژەکەن.

 

لەلایەکی دیکەوە: زیاد جاندار، بەڕێوەبەری بەڕێوەبەرایەتیی ئاوی قەزای چەمچەماڵ بە ئاڤا نیوزی ڕاگەیاند: تاوەکو ڕۆژی پێنجشەممە کارەکانی پرۆژەکە ئەنجام دراون، هاوکات کارە ئیدارییەکانی وەرگرتنی پارە بۆ کۆمپانیاکە تەواو کراون و پارەکەی نەدراوە، لە ئەگەری خەرجنەکردنی پارەی کۆمپانیاکەش، کارەکانی پرۆژەکە دەوەستێت، هاوکات تاوەکو ئێستا لە 4٪ کارەکانی پرۆژەکە تەواو کراون.

 

باکگراوند: پرۆژەی ئاوی گۆپتەپە - چەمچەماڵ، پرۆژەیەكی ستراتیژیی كابینەی نۆیەمی حكومەتی هەرێمی كوردستانە و بە مەبەستی چارەسەركردنی گرفتی كەمئاوی لە چەمچەماڵ و دەورووبەری، ئەم پرۆژەیە زیاتر 480 هه‌زار كه‌س لێی سوودمه‌ند ده‌بن، كاریگه‌ریی ڕاسته‌وخۆی له‌سه‌ر گه‌ڕاندنه‌وه‌ی ڕێژه‌یه‌كی زۆر ئاو بۆ شاری سلێمانی له‌ پرۆژه‌ی ئاوی دووكان بۆ سلێمانی ده‌بێت.