شوان محەممەد: سوودانی دەیەوێت کێشەکان لەگەڵ هەولێر بە ئیداری چارەسەر بکات

ئاڤا نیوز

شرۆڤەکاری سیاسی دەڵێت، سەرەڕای ڕێگرییەکان بەڵام محەممەد شیاع سوودانی و سەرۆکوەزیران مەسرور بارزانی دەیانەوێت کێشە هەڵپەسێردراوەکانی نێوان هەولێر و بەغدا بە ئیداری چارەسەر بکەن.

وێنە گەورەکە: کاتژمێر 09:00ی بەیانی ئەمڕۆ سێشەممە محەممەد شیاع سوودانی، سەرۆکوەزیرانی عێراق گەیشتە هەولێر و لەگەڵ هەریەک لە سەرۆک بارزانی، نێچیرڤان بارزانی و سەرۆکوەزیران مەسرور بارزانی کۆدەبێتەوە، دوانیوەڕۆش سەردانی سلێمانی دەکات و چاوی بە ژمارەیەک سەرۆک حیزب دەکەوێت.

لێدوانی فەرمی: شوان محەممەد، شرۆڤەکاری سیاسی و بەرپرسی پێشووتری لقی پارتی دیموکراتی کوردستان لە بەغدا، لەکاتی بەشداریکردنی لە گەشتێکی هەواڵەکانی ئاڤا میدیا باسی لە ئامانج و گرنگیی سەردانەکەی سوودانی بۆ هەرێمی کوردستان کرد.

چارەسەرکردنی کێشەکانی نێوان هەولێر و بەغدا یەکێک لە تەوەرەکانی کۆبوونەوەکان دەبێت، لەمبارەیەوە شوان محەممەد وتی: "سەردانەکە نیەتباشییە بۆ چارەسەرکردنی کێشەکان.

چارەسەرەکان: وەک شوان محەممەد باسی کرد: "سەرۆکوەزیران مەسرور بارزانی و محەممەد شیاع سوودانی دەیانەوێ کێشە هەڵپەسێردراوەکان بە ئیداری چارەسەر بکەن، هەرچەندە چوارچێوەی هەماهەنگی و هەندێک لایەنی کوردستانی هەوڵ دەدەن کێشە ئیدارییەکان بە سیاسی بکرێن و بەربەست لەپێش هەنگاوەکانی سوودانی دابنێن".

لەلایەکی دیکەوە: پرسی مووچە یەکێکە لەو بابەتانەی لە کۆبوونەوەکانی ئەمڕۆدا قسەی لەسەر دەکرێت، لەمبارەیەوە شوان محەممەد وتی: "کێشەی مووچە لە بنەڕەتدا لێدانە لە حکومەتی هەرێمی کوردستان بۆ ئەوەی لە گەشەکردن بووەستێت، هەندێک لایەنی سیاسیی عێراقی ترسیان لە پەرەسەندنی ئابووری و سیاسیی هەرێمی کوردستان هەیە و، پێیانوایە گەشەکردنی کوردستان وا دەکات شەقامی عێراقی بە فاشلیان بزانن".