سوودانی لە هەولێر و سلێمانی زنجیرەیەک کۆبوونەوە لەگەڵ لایەنە سیاسییەکان دەکات

ئاڤا نیوز

سوودانی بە سەردانێک لە هەرێمی کوردستانە، دوای کۆبوونەوە لەگەڵ  سەرۆکوەزیران مەسرور بارزانی و نێچیرڤان بارزانی، سەرۆکی هەرێمی کوردستان، بڕیارە لە هەولێر و سلێمانی زنجیرەیەک کۆبوونەوە لەگەڵ لایەنە سیاسییەکان بکات.

وێنە گەورەکە: ئەمڕۆ چوارشەممە محەممەد شیاع سوودانی، سەرۆکوەزیرانی عێراق بە سەردانێکی فەرمی گەیشتە هەولێر و لەگەڵ بەرپرسانی باڵای هەرێمی کوردستان و سەرۆک حیزبەکان چەند پرسێکی گرنگ تاوتوێ دەکات، لەوانە نەوت، بودجە و مووچە، سەرژمێری، پێکهێنانی حکومەتی نوێی هەرێمی کوردستان، دۆخی عێراق و ناوچەکە و بەهێزکردنی سەقامگیری.

زانیاریی بەدەستهاتوو: سوودانی لە پیرمام لەگەڵ سەرۆک بارزانی کۆدەبێتەوە، دواتر لە هەولێر چاوی دەکەوێت بە عەلی باپیر، سەرۆکی کۆمەڵی دادگەریی کوردستان و نوێنەری هەڵبژێردراوی پێکهاتەکان بۆ پەرلەمانی کوردستان، ئینجا دەچێتە سلێمانی و چەند کۆبوونەوەیەکی دیکەی دەبێت.

زانیاریی زیاتر: کاتژمێر سێی دوانیوەڕۆ بە فڕۆکە دەچێتە سلێمانی، لەوێ لەگەڵ بافڵ تاڵەبانی، سەرۆکی یەکێتیی نیشتمانیی کوردستان؛ سەڵاحەددین محەممەد بەهائەدین، ئەمینداری یەکگرتووی ئیسلامیی کوردستان؛ شاسوار عەبدولواحید، سەرۆکی جووڵانەوەی نەوەی نوێ؛ لاهوور شێخ جەنگی، سەرۆکی بەرەی گەل و  عەلی حەمە ساڵح، بڕیاردەری ڕەوتی هەڵوێست کۆدەبێتەوە.