بژمێرەكانی سەرژمێری گرێبەستی دوو مانگ كاركردنیان لەگەڵ دەكرێت

ئاڤا نیوز 

 

لە كۆی 61 هەزار دەرچووی زانكۆ و پەیمانگەكان كە فۆڕمی 'بژمێر'ـیان پڕكردووەتەوە، ناوی زیاتر لە 19 هەزاریان دەرچووە و حكومەتی عێراق گرێبەستی دوو مانگ كاركردنیان لەگەڵ دەكات.

 

زانیاریی تایبەت: سەرچاوەیەک لە دەستەی ئاماری هەرێمی كوردستان بە ئاڤا نیوزی ڕاگەیاند: ئەو بژمێرانە گرێبەستی دوو مانگیان لەگەڵ دەكرێت و بۆ هەر مانگێكیش بڕی 250 هەزار دیناریان پێدەدرێت، هاوكات بەشداری لە چەند خولێكیش دەكەن و بۆ هەر ڕۆژێک 10 هەزار دیناریان پێدەدرێت.

 

ڕاگەیێنراوی فەرمی: بەپێی ڕاگەیێنراوێكی دەستەی ئامار، بژمێرەکان  لەسەر بنەمای پێداویستی و شوێنی جوگرافی و قەرەباڵخیی دانیشتووان و شوێنی نیشتەجێبوونی خۆیان و  لەسەر ئاستی گەڕەک یان گوند دەستنیشانکراون.

 

ژمارەکان وا دەڵێن: ئەو ناوانەی کە دەرچوون، لەسەر ئاستی پارێزگا و ئیدارە سەربەخۆکان بەمشێوەیەن:

هەولێر: حەوت هەزار و 487 بژمێر

پارێزگای دهۆک: دوو هەزار و 906 بژمێر.

سلێمانی: چوار هەزار و 625 بژمێر.

ئیدارەی سەربەخۆی سۆران: هەزار و 180 بژمێر.

ئیدارەی سەربەخۆی ڕاپەڕین: هەزار و 304 بژمێر.

ئیدارەی سەربەخۆی گەرمیان: 869 بژمێر.

ئیدارەی سەربەخۆی زاخۆ: 706 بژمێر.

ئەمەش بزانە: ئەو کارمەندانەی ناوەکانیان دەرچووە، پێویستە دەستبەجێ پەیوەندی بە شوێنەکانیان بکەن بۆ ئەوەی لە کاتی دیاریکراودا لە هۆڵەکانی ڕاهێنان  ئامادەبن، لە ئەگەری ئامادەنەبوون لەکاتی دیاریکراودا ئەوا شوێنەکانیان بەدەرچووێکی دیکە پڕدەکرێتەوە.