حیزبوڵڵا کوژرانی بەرپرسی ڕاگەیاندنی حیزبەکەیان پشتڕاست دەکاتەوە

ئاڤا نیوز

 

حیزبوڵڵای لوبنان بە فەرمی کوژرانی محەمەد عەفیف نابلسی، بەرپرسی ڕاگەیاندنی حیزبەکەیانی لە هێرشێکی ئیسرائیل لە بەیروت پشتڕاست کردەوە.

 

وێنە گەورەکە: بە ئامانجگرتنی سەرکردەکانی حیزبوڵڵای لوبنانی لەلایەن ئیسرائیلەوە بەردەوامە و ڕۆژی یەکشەممە محەممەد عەفیف،  بەرپرسی پەیوەندییەکانی  ڕاگەیاندنی حیزبوڵڵای لوبنان لە هێرشێکی ئیسرائیل لە بەیروتی پایتەختی لوبنان کوژرا.

 

ڕاگەیێنراوی فەرمی: حیزبوڵڵای لوبنان ڕایگەیاند: "پرسەی خۆمان ڕادەگەیێنین بەبۆنەی شەهیدبوونی سەرکردەیەکی گەورەی میدیا لەسەر ڕێگای قودس، لە هێرشێکی تاوانکارانەی ئیسرائیلدا".

 

چی ڕوویدا: ڕۆژی یەکشەممە 17-11-2024، چەند سەرچاوەیەکی ئەمنی لوبنانی ئەوەیان بە ئاژانسەکانی هەواڵ ڕاگەیاندبوو کە محەممەد عەفیف لە هێرشێکی ئیسرائیل لە بەیرووت کوژراوە، هاوکات سوپای ئیسرائیلیش ڕایگەیاند: ئامانجی هێرشەکەیان بۆ سەر بەیرووت بۆ بە ئامانجگرتنی محەممەد عەفیف بووە.

 

ئەوەی پێویستە بیزانیت: محەممەد عەفیف لە ساڵی 2014وە وەک بەرپرسی پەیوەندییە میدیاییەکانی حیزبوڵڵا دامەزراوە، جگە لەوەی وەک ڕاوێژکاری ڕاگەیاندنی نەسروڵڵا کاری کردووە. هاوکات لە ساڵی 2006 سەرپەرشتی هەواڵ و بەرنامە سیاسیەکانی کەناڵی هەواڵی مەناری پارتەکەی کردووە.