پشووی ئەو فەرمانبەرانەی گەڕاونەتەوە ناوچە کوردستانییەکان درێژ کرایەوە

ئاڤا نیوز

 

ژووری عەمەلیاتی سەرژمێری لە هەرێمی کوردستان پشووی سەرژمێری بۆ ئەو فەرمانبەر و ئەفسەر و کارمەندانە درێژکردەوە کە خەڵکی ناوچەکانی سنووری ماددەی 140ن و بۆ بەشداریکردن لە سەرژمێری گەڕاونەتەوە ناوچەکانی خۆیان.

 

لێدوانی فەرمی: هێمن میرانی، ئەندامی ژووری عەمەلیاتی سەرژمێری هەرێمی کوردستان، بە کوردستان حەسەن، پەیامنێری دیپلۆماسیی ئاڤا ڕاگەیاند: بە مەبەستی تەواوکردنی پرۆسەی سەرژمێری پشووی فەرمانبەر و ئەفسەر و کارمەندان بۆ ئەوانەی خەڵکی ناوچەکانی سنووری ماددەی 140ن بۆ بەشداریکردن لە پرۆسەکە گەڕاونەتەوە ناوچەکانی خۆیان، تاوەکو 10ـی کانوونی یەکەم درێژدەکرێتەوە بۆ ئەوەی فۆرمی دووەم لە دوای قەدەغەی هاتووچۆ پڕبکەنەوە.

 

زانیاریی زیاتر: لەدوای تەواوکردنی فۆرمی یەکەم کە لە رۆژانی 20و 21ی مانگ پڕدەکرێنەوە، قۆناغێکی دیکە دەست پێدەکات کە پرسیار و زانیاری زیاتری تێدایە و پێویستە لەو کاتەی بژمێرەکان سەردانی خێزانەکان دەکەنەوە لایەنی کەم یەکێک لە ئەندامانی خێزان لەو شوێنانە بمێننەوە و هەموو بەڵگەنامەکانی ئەندامانی خێزانەکەیانی لابێت و فۆرمی دووەم بە دروستی پڕبکەنەوە، بۆیە رێگە بەو کەسانەش دەدرێت لە ناوچەکانیان بمێننەوە.

 

ئەوەی پێویستە بیزانیت: حکومەتی هەرێمی کوردستان، پشووی ئەو کەسانە بە کراوەیی دەهێڵێتەوە و دەرفەتییان دەدرێتێ تا ئەو کاتەی بژـیرەکان دووبارە دەچنەوە لایان تاوەکو هەموو پرۆسەی سەرژمێری تەواودەبێت.