دەم پارتی داوا لە تورکیا دەکات دان بە زمانی کوردیدا بنێت و چوار یاسا هەموار بکاتەوە

ئاڤا نیوز

دەم پارتی داوا لە حکومەتی تورکیا دەکات دان بە زمانی کوردی بنێت و یاساکانی بەرەنگاربوونەوەی تیرۆر، سزادان، دادبینیی تاوانەکان و جێبەجێکردنی سزاکان هەموار بکرێنەوە.

چیرۆکی سەرەکی: دەم پارتی ڕاپۆرتێکی 99 لاپەڕەیی پێشکەشی پەرلەمانی تورکیا کردووە، داوا دەکات مافی سەرجەم پێکهاتەکانی تورکیا لەسەر بنەمای "هاوڵاتیبوونی یەکسان" بپارێزرێت و تەواوی زیندانییە سیاسییەکانیش ئازاد بکرێن.

هاوکات داوا دەکات وەک ڕەخساندنی زەمینەسازیی یاسایی بۆ پرۆسەی ئاشتی، هەریەک لە یاساکانی بەرەنگاربوونەوەی تیرۆر، سزادان، دادبینیی تاوانەکان و جێبەجێکردنی سزاکان هەموار بکرێنەوە.

بەتەنیشت ئەم بابەتەوە: دەم پارتی پابەندبوونی تورکیا بە بڕیارەکانی دادگای مافی مرۆڤی ئەوروپا و دادگای دەستووریی تورکیا، بۆ ئازادکردنی زیندانییە سیاسییەکان بە پێویست دەزانێت.

داواش دەکات هەڵسەنگاندن بۆ پێدانی مافی هیوا بە عەبدوڵڵا ئۆجەلان بکرێت. ئامانج لەوەش ئازادکردنی ئۆجەلانە بە مەرج و کردنەوەی دەرگایە بۆ ئەوەی ئەکادیمیست، کەسانی پسپۆڕ و شارەزا لەگەڵیدا کۆببنەوە.

زانیاریی زیاتر: لە ڕاپۆرتەکەدا داوا کراوە دڵنیایی یاسایی بدرێت بۆ خوێندن بە زمانی دایک (زمانی کوردی) و هیچ هاووڵاتییەکیش بە هۆی زمان و ناسنامەوە پەراوێز نەخرێت.

لەلایەکی دیکەوە: دەم پارتی داوا دەکات کۆتایی بە دانانی قەییوم بهێنرێت بۆ سەرۆک شارەوانییە هەڵبژێرراوەکان و ئیدارە خۆجێیەکانیش بەهێزتر بکرێن و دەسەڵاتی زیاتریان پێ بدرێت.