گۆڕان: كشانەوەمان لە پۆستە حكومی و خۆجێیەكان تەنها لەسەر میكانیزمی كارگێڕی ماوە

ئاڤا نیوز

 

بزووتنەوەی گۆڕان ڕێكارەكانی ڕادەستكردنەوەی پۆستە حكومی و ئیدارییەكانی دەست پێكردووە، ئەوەش دوای ئەوە دێت کە ئەو حیزبە بەر لە هەڵبژاردن بڕیاری کشانەوەی لە كابینەی نۆیەمی حكومەتی هەرێمی كوردستان  دا.

 

وێنە گەورەكە: جڤاتی نیشتیمانی بزووتنەوەی گۆڕان بەر لە هەڵبژاردنی خولی شەشەمی پەرلەمانی كوردستان، بڕیاری كشانەوەی لە حكومەت دا. لە پۆستە سیاسییەكان؛ هەریەك لە جێگری سەرۆكی هەرێمی كوردستان و سێ وەزیری كابینەی نۆیەم پابەندی بڕیاری حیزبەكەیان بوون، تەنها دانا عەبدولكەریم، وەزیری ئاوەدانكردنەوە و نیشتەجێكردن بە فەرمی ڕایگەیاند پابەندی بڕیاری حیزبەكەی نابێت.

 

لێدوانی فەرمی: دلێر عەبدولخالق، وتەبێژی بزووتنەوەی گۆڕان لە لێدوانێكی ڕۆژنامەوانیدا ڕایگەیاند، دوای بڕیاری جڤاتی نیشتیمانی بزووتنەوەی گۆڕان بە كشانەوە لە حكومەتی هەرێمی كوردستان و حكومەتی خۆجێیی پارێزگاكان، هەریەك لە مستەفا سەید قادر، جێگری سەرۆكی هەرێمی كوردستان، ئاوات شێخ جەناب، وەزیری دارایی و ئابووری، كوێستان محەممەد، وەزیری كار و كاروباری كۆمەڵایەتی، كەمال موسلیم وەزیری بازرگانی و پیشەسازی، پابەندی بڕیارەكەی جڤاتی نیشتیمانی بوونە و نامەی دەست لەكاركێشانەوەیان پێشكەشكردووە، هەروەها دكتۆر هەڤاڵ ئەبوبەكر نامەی دەستلەكاركێشانەوەی لە پۆستی پارێزگاری سلێمانی داوەتە وەزیری ناوخۆی هەرێمی كوردستان.

 

لەلایەکی دیکەوە: وتەبێژی بزووتنەوەی گۆڕان ڕوونیكردەوە، دەستلەكارهەڵگرتنی بەرپرسانی حكومی و ئیدارە خۆجێیەكان، پەیوەندی بە ڕۆتین و میكانیزمی كارگێڕییەوە هەیە بۆ وەرگرتنی ئەستۆپەكی لەو  بەرپرسیاریەتییانە، دوای ئەو قۆناغە هەر وەزیرێك یان بەرپرسێكی ئیداری لە پۆستەكەی بمێنێتەوە، نوێنەرایەتی بزووتنەوەی گۆڕان ناكات.