بارەگای بارزانی سەركۆنەی تیرۆركردنی كاندیدەکەی بەغدا دەكات

ئاڤا نیوز

بارەگای بارزانی سەركۆنەی تیرۆركردنی سەفا مەشهەدانی، ئەندامی ئەنجوومەنی پارێزگای بەغدا و كاندیدی هاوپەیمانیی سیادە دەكات.

چیرۆكی سەرەكی: بەرەبەیانی ئەمڕۆ، لە ناوچەی تارمیەی باکووری بەغدا، ئۆتۆمبێلی سەفا مەشهەدانی، کاندیدی (هاوپەیمانیی سیادە) کە هاوکات ئەندامی ئەنجوومەنی پارێزگای بەغداشە، لەڕێگەی بۆمبی چێنراوەوە بە ئامانج گیرا و ڕووداوەکە بووە هۆی کوژرانی ئەو کاندیدە.

بڵاوكراوەی فەرمی: بارەگای بارزانی لە ڕاگەیێنراوێكدا وێڕای سەركۆنەكردنی تیرۆركردنی سەفا مەشهەدانی، سەرەخۆشی لە خانەوادە و کەسوکاری ئەو كاندیدە و هاوپەیمانێتیی سیادە و خەمیس خەنجەر، سەرۆکی هاوپەیمانێتیەکە دەکات. ڕاشیگەیاند، کردەوەی لەمجۆرە، هەڕەشەیە بۆ سەر ئاشتەوایی و سەقامگیریی کۆمەڵگە و پێویستە ئەنجامدەرانی ئەم کردەوەیە ئاشکرا بکرێن و ڕادەستی یاسا بکرێن.

ئەوەی پێویستە بیزانیت: 11ـی مانگی داهاتوو هەڵبژاردنی پەرلەمانی عێراق بەڕێوەدەچێت و لەئێستاوە کاندیدەکان بانگەشەی گەرم و گوڕ بەڕێوەدەبەن، سەفا مەشهەدانی یەکەمین کاندیدی ئەم خولەی پەرلەمانی عێراقە کە بە ئامانج بگیرێت و بکوژرێت.