بەرەی گەل بڕیاری بەشداریكردن لە هەڵبژاردنی پەرلەمانی عێراق دەدات

ئاڤا نیوز

سەرۆكی لیستی بەرەی گەل لە بازنەی سلێمانی ڕایدەگەیەنێت، لاهوور شێخ جەنگی، سەرۆكی بەرەی گەل، لە زیندانەوە پەیامێكی بۆ ئەندام و لایەنگرانی بەرەی گەل  ناردووە و دووپاتی دەكاتەوە كە بەرەی گەل بەشداریی هەڵبژاردن دەكەن.

چیرۆكی سەرەكی: لەبارەی بەشداریکردنی بەرەی گەل لە هەڵبژاردنی خولی شەشەمی ئەنجوومەنی نوێنەرانی عێراق، ڕۆژی 5ـی ئەم مانگە، سەرۆكی تیمی پارێزەرانی لاهوور شێخ جەنگی كە هەر خۆی سەرۆكی لیستی بەرەی گەلە لەم هەڵبژاردنە باسی لەوە كرد، لاهوور شێخ جەنگی، کەسە نزیکەکانی و بەرپرسانی حیزبەکەی سەرپشک کردووە خۆیان بڕیار بدەن بەشداری هەڵبژاردن بکەن یاخود نا.

لێدوانی فەرمی: بورهان ڕەشید گوڵە، سەرۆكی لیستی بەرەی گەل لە بازنەی پارێزگای سلێمانی ڕایگەیاند، دوای ئەوەی دوێنێ پەیامێكمان ئاڕاستەی لاهوور شێخ جەنگی كرد لە زیندان، دەربارەی بەشداربوون یاخود بەشدارنەبوون لە هەڵبژاردندا؛  وەڵامم پێ گەیشتەوە كە "بەڵێ؛ بەشدار دەبین و بەردەوام دەبین"

باکگراوند: شەوی 22ـی ئابی ئەمساڵ، هێزێکی زۆری کۆماندۆ و دژەتیرۆری یەکێتی هێرشیان کردە سەر شوێنی مانەوەی لاهوور شێخ جەنگی لە تەنیشت هۆتێل لالەزار، دوای شەڕێکی چەند کاتژمێری سەرەنجام، لاهوور شێخ جەنگی، سەرۆكی بەرەی گەل و پۆڵاد شێخ جەنگیی برای دەستگیرکران و ژمارەیەک چەکدار لە هەردوولا کوژران. هاوكات بەپێی زانیارییەکانی ئاڤا؛ 200 بۆ 250 کەس كە ئەندامی و لایەنگری حیزبەكەی لاهوور شێخ جەنگیـن، لە شەوی ڕووداوەکەی لالەزار دەستگیر کراون و ئێستا لە زیندانن.