ئارین مەسرور بارزانی: کاری لە پێشینەمان چارەسەرکردنی قەیرانە ژینگەییەکانە

ئاڤا نیوز

 

پرۆژەی "کوردستان فاوەندەیشن" بە ئامادەبوونی دەیان کەسایەتی و نوێنەری وڵاتان لە هەولێر کرایەوە، لە میانی کردنەوەی پڕۆژەکەدا ئارین مەسرور بارزانی، تیشکی خستەسەر گرنگیدان بە ڕەخساندنی دەرفەتی کار بۆ گەنجان و هەوڵدان چارەسەری پرسە ژینگەییەکان.

 

وێنە گەورەکە: ئەمڕۆ دووشەممە 2-12-2024، پرۆژەی "کوردستان فاوەندەیشن" بە ئامادەبوونی غانم مفتاح، ئەو هاووڵاتییە قەتەرییەی کە ئاهەنگی دەستپێکردنی مۆندیالی 2022ی قەتەری کردەوە، لە شاری هەولێر ڕاگەیێنرا. دوای ئەم هەنگاوە، کوردستان فاوندەیشن دەبێتە سەکۆیەکی گرنگ بۆ پێشخستنی تواناکانی گەنجان. 

 

لێدوانی فەرمی: ئارین مەسرور بارزانی، لەمیانەی ڕاگەیاندنی پڕۆژەکەدا ڕایگەیاند: ئەم پڕۆژەیە بۆ پڕکردنەوەی ئەو کەلێنە بوو کە وای دەکرد گەنجان بێ ئومێدبن، ئەم دامەزراوە فراوانە درێژە پێدەری ئەو کاروانەیەی کە دەستمان پێکردوە بۆیە بە گەشبینییەوە لە داهاتوو دەڕوانین. 

 

کوردستان فاوندەیشن، دەستپێشخەرییەکی نوێ و جیاوازە بۆ پشتیوانیی و پێشخستنی توانای هاووڵاتییانی هەرێمی کوردستان لە ڕێگەی پرۆژەی جیاواز و کاری جۆری. 

 

ئەم دامەزراوەیە دەبێتە چەترێک بۆ کۆکردنەوەی سەرجەم پرۆژەکانی بواری گەنجان و کار و خۆبەخشی و گۆڕانی کەشوهەوا و پەروەردە و تەکنەلۆژیا، لەگەڵ چەندین دەستپێشخەریی نوێ لە بواری پێشخستنی کۆمەڵگە.