ئاڤای خەڵک؛ قوتابخانەیەک لە ناحیەی بەردەقارەمانی بازیان مەترسیی ڕووخانی لەسەرە

ئاڤا نیوز

قوتابخانەی ڕازی بنەڕەتی لە ناحیەی بەردەقارەمانی سەر بە قەزای بازیان مەترسی ڕووخانی لەسەرە و بەهۆیەوە مەترسی لەسەر ژیانی قوتابییان دروست بووە.

زانیاریی بەدەستهاتوو: پشتیوان غازی، بەڕێوەبەری قوتابخانەکەیە و بە ئاڤای وت، دیواری قوتابخانەکەمان هێندەی نەمانەوە بڕوخێت بەسەر قوتابیەکاندا، هەر ڕۆژە و لا دیوارێک لە قوتابخانەکە دەڕوخێت و ژیانی قوتابییەکان لە مەترسیدایە، ئەگەر زوو فریامان نەکەون لەوانەیە کارەساتێک ڕووبدات.

شنە تەها مامۆستایەکی قوتابخانەکەیە بە ئاڤای وت، قوتابییەکان وایان لێهاتووە دەترسن و ناوێرن بێنە پۆلەوە و لە وانەکاندا دابنیشن، بەهۆی ڕۆچوونی زەوی قوتابخانەکەشەوە هەندێک چاڵ دروست بووە و ڕۆژانە مشک و جرج لەو چاڵانەوە دێنە پۆلەکانەوە.

لێدوانی فەرمی: نەژاد عەبدوڵڵا، بەرێوەبەری گشتی پەروەردەی سلێمانی بە ئاڤای ڕاگەیاند: دەرخستەمان بۆ نۆژەنکردنەوەی 105 قوتابخانە کردووە، ڕەزامەندی 20 قوتابخانەمان بۆ هاتووەتەوە، قوتابخانەی ڕازی بنەرەتی یەکێکە لەو 20 قوتابخانەیەی بەڵێنمان پێدراوە پێش سەری ساڵ پارەمان بۆ خەرج بکەن، بەپێی دەرخستەکە 18 ملیۆن و 750 هەزار دیناری پێویستە و هەرکات پارەکە خەرجکرا دەست بە نۆژەنکردنەوەی دەکەین.