ئاڤای خەڵک؛ قەزای بنەسڵاوە 11 ساڵە چاوەڕێی تەواوبوونی قوتابخانەیەک دەکەن

ئاڤا نیوز

لە قەزای بنەسڵاوە لە هەولێر ماوەی 11 ساڵە بینای قوتابخانەیەکی ئامادەیی بە تەواو نەکراوی بەجێهێڵدراوە و ئێستا بووەتە شوێنی کۆبوونەوەی زبڵ و خاشاک.

زانیاریی بەدەستهاتوو: سەلمان محەممەد، دانیشتوویەکی قەزاکەیە، بە ئاڤای وت، کچەکەم لە پۆلی ٧ـی بنەڕەتی بوو کاتێک دەستکرا بە دروستکردنی ئەم قوتابخانەیە، ئێستا خوێندنی تەواوکردووە و بووەتە پزیشکی ددان و دامەزراوە کەچی ئەم بینایە هەر تەواو نەبوو.

دانیشتوویێکی دیکەی قەزاکە دەڵێت، تەواوکردنی بیناکە زۆر پێویستە، ئێستا منداڵەکانمان ڕۆژانە 30 بۆ 40 خولەک بەپێ دەڕۆن تاوەکو دەگەنە قوتابخانەکەیان.

لەلایەکی دیکەوە: خەبیر قەرەنی، بەڵێندەری پڕۆژەکەیە، بە ئاڤای وت، نزیکەی 75%ـی بیناکە تەواو بووە، نزیکەی ملیارێک دینارم خەرجکردووە و پارەم بۆ خەرج ناکرێت، هەرکات پارەمان بدەنێ بەزوویی کارەکان تەواو دەکەین.

لێدوانی فەرمی: لوقمان سەعید، بەرێوبەری گشتی پەروەردەی هەولێر بە ئاڤای وت، بەهۆی نەبوونی بوودجە چەند بینایەکی دیکەی قوتابخانەش هەن وەستاون، بەڵام بۆ ئەم قوتابخانەیە بە تایبەتی خۆم بەدواداچوونی بۆ دەکەم و هەوڵی چارەسەرکردنی کێشەکانی دەدەین.