خەڵکی هەرێمی کوردستان چاوەڕێی پێکهێنانی حکومەتن

ئاڤا نیوز

 

خەڵکی کوردستان چاوەڕوانی پێکهێنانی کابینەی نوێی حکومەتی هەرێمی کوردستانن، بۆ ئەمەش چاوەکان لەسەر نزیکبوونەوەی پارتی و یەکێتین بۆ ئەوەی وەک دوو لایەنی براوەی هەڵبژاردن ڕێککەوتن بکەن.

 

زانیاریی زیاتر: پارتی دیموکراتی کوردستان پێیوایە بە بەڕێوەچوونی یەکەمین کۆبوونەوەی پەرلەمان شەرعیەتی هەڵبژاردنی هەرێمی کوردستان جێگیر کراوە.

 

لێدوانی فەرمی: ئەندامێکی کۆمیتەی ناوەندی پارتی دیموکراتی کوردستان بە ئاڤا نیوزی گوت: "بەهاوکاری هەموو لایەک شەرعیەتی هەڵبژاردنی هەرێمی کوردستانمان جێگیر کرد، ئێمە شتێکی گەورەمان کرد، دۆخی ناوچەکە کاریگەری لەسەر خێراکردنی کۆبوونەوەکانی نێوان یەکێتی و پارتی دەبێت".

 

لەلایەکی دیکە:  هەر لەبارەی یەکەم کۆبوونەوەی خولی شەشەمی پەرلەمانی کوردستان پۆڵا سیروان تاڵەبانی، ئەندامی ئەنجوومەنی سەرکردایەتی یەکێتی بە ئاڤای ڕاگەیاند: دوای ئەوەی کۆبوونەوەی پەرلەمان بە باشی تێپەڕی، بێگومان لەم ڕۆژانە بابەتی پێکهێنانی حکومەت چڕدەبێتەوە و کۆبوونەوەکان لە ئایندەیەکی نزیک دەستپێدەکەنەوە و دەمانەوێت زوو حکومەت پێکبهێنرێت.

 

ئەوەی پێویستە بیزانیت: دوای یەکەمین کۆبوونەوەی خولی شەشەمی پەرلەمان، تەنیا یەک مانگ لە پێش لایەنە سیاسییەکان دەبێت، بۆ ئەوەی ڕێککەوتن بکەن و پرۆسەی پێکهێنانی حکومەت یەکلایی بکەنەوە.

 

باکگراوند: دوای ئەوەی یەکەمین کۆبوونەوەی خولی شەشەمی پەرلەمانی کوردستان لە ڕۆژی 2-12-2024 بەڕێوەچوو و ئەندامانی پەرلەمان سوێندی یاساییان خوارد، کۆبوونەوەکە بە کراوەیی بەجێهێڵدرا.