بەهۆی کەوتنی حەلەب زیاتر لە 30 هەزار خێزانی کورد ئاوارە دەبن

ئاڤا نیوز

 

ماوەی هەفتەیەکە شەڕی گرووپە چەکدارەکانی ئۆپۆزسیۆنی سووریا و حکومەتی ئەو وڵاتە بەردەوامە و تا دێت ئاوارەبوونی کوردەکانی ئەو وڵاتەش زیاتر دەبێت.

 

وێنە گەورەکە: دەستەی تەحریروشام لە هێرشەکانیان بۆ سەر پارێزگای حەما بەردەوامە، بەڵام تاوەکو ئێستا نەیانتوانیوە بچنە ناو شارەکە و تەنیا شەش کیلۆمەتر دوورن، لەوێ هێزەکانی ڕژێم بەرگرییەکی سەخت دەکەن و لە ئاسمانیشەوە فڕۆکە جەنگییەکانی سووریا و ڕووسیا بە سەختی بۆردوومانی چەکداران دەکەن.

 

بابەتە ستراتیژییەکە: حەما بە خاڵی یەکلاکەرەوە بۆ هێزەکانی ڕژێمی بەشار ئەسەد دادەنرێت و ئەگەر ئەم شارە بکەوێت وەک چاودێران دەڵێن ئیتر داڕمانی تەواوەتی ڕوودەدات و گرووپە چەکدارەکان بە ئاسانی دەتوانن بچنە حومس و دوای ئەوەش بگەنە دیمەشقی پایتەخت و شوێنی مان و نەمانی ئەسەد، هەر بۆیە هێزێکی زۆری حکومەتی سووریا هێنراوەتە حەما و ئێران و ڕووسیاش جەخت لەوە دەکەنەوە کە نابێت ئەم شارە بکەوێت.

 

ژمارەکان وادەڵێن: لەماوەی یەک هەفتەدا بەهۆی ئەم شەڕە و بەپێی ئامارەکانی ڕەوانگەی سووری بۆ مافەکانی مرۆڤ، تاوەکو ئێستا 659 کەس کوژراون کە بەم شێوەیەیە:

276  کوژراو لە دەستەی تەحریروشام.
59  کوژراو لە سوپای نیشتمانی.
217  کوژراو لە هێزەکانی ڕژێم و گرووپە چەکدارەکانی نزیک لە ئێران.
107  هاووڵاتی سڤیل کوژراون.

 

ئەوەی پێویستە بیزانیت: بەهۆی گرتنی حەلەب تاوەکو ئێستا زیاتر لە 30 هەزار خێزان لەو پارێزگایە ئاوارەی ناوچەکانی ژێردەسەڵاتی هەسەدە بوون و بەشێکیشیان ڕوویان کردووەتە عەفرین و لە دۆخێکی سەختدان، تەنانەت چوار منداڵ لە ئەنجامی سەرما و سەختی ئاوارەیی گیانی لەدەستدا کە یەکێکیان تەمەنی تەنیا چوار مانگە.

 

لەلایەکی دیکەوە: هەسەدە ڕایگەیاندووە شکستیان بە هەوڵێکی دزەکردنی گرووپە چەکدارەکانی نزیک لە تورکیای بۆ شاری منبج هێناوە.

 

لە گۆشەیەکی دیکە: هەر ئەمڕۆ فەرماندەیی ناوەندیی ئەمریکا (سێنتکۆم) لەناوبردنی چەندین مووشەک و بارهەڵگر و تانک و زرێپۆش و گولـلەی هاوەنی گرووپەکانی نزیک لە ئێرانی لە دێرەزوور ڕاگەیاند و دەڵێت ئەوانە ئامادەكرابوون بۆ ئەوەی هێزەکانی ئەمریکا و هاوپەیمانان لە باکووری دێرەزوور بکەنە ئامانج .