حکومەتی هەرێمی کوردستان: هیوادارین سووریای داهاتوو ئازاد، ئارام، سەقامگیر بێت

ئاڤا نیوز

 

حکومەتی هەرێمی کوردستان لە یەکەم کاردانەوەی پەیوەست بە گۆڕانی دەسەڵات لە سووریا، ڕاگەیێنراوێکی بڵاوکردەوە و دەڵێت، "هیوادارین سووریای داهاتوو ئازاد، ئارام، سەقامگیر بێت و مافی هەموو پێکهاتەکانی تێدا پارێزراو بێت".

 

وێنە گەورەکە: دوای 50 ساڵ حوکمڕانی بنەماڵەی ئەسەد لە سووریا، بەرەبەیانی ڕۆژی یەکشەممە چەکدارانی ئۆپۆزیسیۆنی سووریا شاری دیمەشقی پایتەختی سووریایان کۆنترۆڵکرد و تاوەکو ئێستا چارەنووسی بەشار ئەسەد، سەرۆککۆماری پێشووی ئەو وڵاتە نادیارە.

 

ڕاگەیێنراوی فەرمی: لە ڕاگەیێنراوی فەرمی حکومەتی هەرێمی کوردستاندا هاتووە کە:

ــــ گۆڕانکاریی خێرا و کەوتنی ڕژێمی دەسەڵاتداریی سووریا، سەردەمێکی نوێی هێناوەتە کایەوە.

ـــ ڕێز لە بڕیار و ئیرادەی خەڵکی سووریا دەگرین.

ـــ هیوادارین سووریای داهاتوو ئازاد، ئارام، سەقامگیر بێت و مافی هەموو پێکهاتەکانی تێدا پارێزراو بێت.

 

ئەوەی پێویستە بیزانیت: دوای کەوتنی دیمەشقی پایتەختی سووریا، چەکدارانی ئۆپۆزیسیۆن بە دوای بەشار ئەسەد، سەرۆکی هەڵاتووی  سووریادا دەگەڕێن. هاوکات، لێپرسینەوە لە ئەفسەرانی سەربازی و هەواڵگریی سووریا دەکرێت کە ڕەنگە زانیارییان لەسەر جموجۆڵەکانی بەشار ئەسەد هەبێت.