پارتی: هیوادارین قۆناغی داهاتوو ببێتە سەرەتایەکی نوێ بۆ پێکەوە ژیان لە سووریا

ئاڤا نیوز

 

سەبارەت بە دۆخی سووریا، مەکتەبی سیاسیی پارتی دیموکراتی کوردستان ڕاگەیێنراوێکی بڵاوکردەوە، باس لەوە دەکات کە ڕێز لە بژاردە و ئیرادەی گەلانی سووریا دەگرن.

 

وێنە گەورەکە: ئەمڕۆ یەکشەممە 8-12-2024، چەکدارانی ئۆپۆزیسیۆن توانییان شاری دیمەشق بگرن و کۆتایی بە 53 ساڵەی دەسەڵاتی بنەماڵەی ئەسەد بێنن.

 

ڕاگەیێنراوی فەرمی: مەکتەبی سیاسیی پارتی دیموکراتی کوردستان، ڕایگەیاند: ڕێز لە بژاردە و ئیرادەی گەلانی سووریا دەگرین، هیوادارین قۆناغی داهاتوو خۆشی و ئارامی بێت و ببێتە مایەی کۆتاییهاتنی ئاڵۆزییەکان.

 

لە ڕاگەیێنراوەکەی دا پارتی دەڵێت: هیوادارین دۆخی سووریا ببێتە سەرەتایەکی نوێ بۆ پێکەوە ژیان و یەکتر قبوڵکردنی سەرجەم پێکهاتەکان، هەروەها ژینگەیەکی لەبار و دەرفەتی گونجاو و سەردەمیانە بۆ ژیانی شایستە بە گەلانی سووریا لە هەموو ڕوویەکەوە بڕەخسێنێت.

ئەوەی پێویستە بیزانیت: پارتی خوازیارە گۆڕانکارییەکان کاریگەریی ئەرێنی لەسەر پەیوەندییەکانی دەرەوەی سووریا بە باشی هەبێت، هەروەها لە چارەسەرکردنی گرفت و پەرەسەندنەکانی ئەم چەند ساڵەی دوایی لە سەرتاسەری ناوچەکە زمانی دیالۆگ ببێتە بنەمای سەرەکی بۆ چارەسەری هەموو کێشەکان و ڕێز لە ئیرادە و خواستی گەلان بگیرێت.