ڕابەری بزووتنەوە: ناسیاومان لەناوی تەحریرولشام هەیە و بەدواداچوون بۆ پێشمەرگە دیلەکان دەکەین

ئاڤا نیوز

ڕابەری بزووتنەوەی ئیسلامی کوردستان هەڵوێستی خۆی بۆ دۆزینەوەی ئەو پێشمەرگەیەی لە زیندانەکانی سووریایە دەردەبڕێت، دەڵێت "پەیوەندییەکانمان بۆ دۆزینەوەی پێشمەرگەکە بەکاردێنین و ئەنجامی باشی دەبێت ئینشاڵا".

 

چیرۆکی سەرەکی: عیسا عەبدوڵڵا خدر لە 2-8-2014، لە کاتی هێرشی داعش بۆ زوممار بێسەروشوێن بووە، دوای ڕووخانی ڕژێمی بەعس لە سووریا پەیامنێرێکی فریلانس لە یەکێک لە زیندانەکانی سووریا لە تیکتۆک ناوی "عیسا عەبدوڵڵا خدر" دەخوێنێتەوە دەڵێت خەڵکی قەزای ئاکرێ سەر بە پارێزگای مووسڵە.

 

لێدوانی فەرمی: لیوا بەختیار عومەر، ئەمینداری گشتیی هێزەکانی پێشمەرگە، بە ئاڤا نیوزی ڕاگەیاند: لەبەر ئەوەی تەحریرولشام و محەممەد جۆلانی تازە هاتوونەتە سەر حکوم، بۆیە هیچ پەیوەندییەکمان نییە، دەبێت بۆ دۆزینەوەی ئەو پێشمەرگەیە پەیوەندییە کەسییەکان بەکاربهێنین.

ئەمینداری گشتیی هێزەکانی پێشمەرگە ئەوەشی گوت: کەسایەتییەکی وەکو مامۆستا عیرفان عەبدولعەزیز پێشبینی دەکەم پەیوەندییەکانی لەگەڵ گرووپەکانی سووریا وەک تەحریرولشام باش بێت، بۆیە دەکرێت لە ڕێی ئەو و پەیوەندییەکانی بەکاربهێنین.

 

لەلایەکی دیکەوە: عیرفان عەبدولعەزیز، ڕابەری بزووتنەوەی ئیسلامی کوردستان لەمبارەیەوە بە ئاڤا نیوزی ڕاگەیاند: ئێوە پەیوەندیتان کردووە، زانیارییەکانی ئەو پێشمەرگەیەمان پێ بدەن، ئەوەی بە ئێمە بکرێت بەدواداچوونی بۆ دەکەین لە ڕێگەی پەیوەنییەکانمان و ناسیاوەکانمان لە تەحریرولشام، ئینشاڵڵا ئەنجامەکەی باش دەبێت.