بڕیارە سبەی بەغدا 758 ملیار دینار بۆ مووچەی مانگی 11 بنێرێت

ئاڤا نیوز

 

بڕیارە سبەی چوارشەممە گوژمەیەک پارە بۆ مووچەی مانگی 11ی مووچەخۆرانی هەرێمی کوردستان لەلایەن بەغداوە بنێردرێت.

 

وێنە گەورەکە: پێچەوانەی ڕێککەوتنی هەردوو حکومەتی هەرێمی کوردستان و عێراق و بڕیاری دادگای فیدراڵی، تاوەکو ئێستا کێشەی مووچەخۆرانی هەرێمی کوردستان لە بە‌غدا چارەسەرنەکراوە، هێشتا پارەی مووچەی مانگی 10 بەتەواوی نەنێردراوە و زیاتر لە 50 ڕۆژی هیچ مووچەیەک دابەش نەکراوە، بەپێی ئەو بڕیارەی دراوە بۆ مانگەکانی 11 و 12 ەش بەهەمانشێوە کورتهێنان دەبێت.

ئەوەی پێویستە بیزانیت: دوای هەوڵە بەردەوامەکانی سەرۆکوەزیران مەسرور بارزانی، ئێستا وەزارەتی دارایی عێراق بڕیاری داوە کێشەی کورتهێنانی مانگەکانی 10 و 11 پڕبکاتەوە، بۆ چارەسەرکردنی کێشەی مانگی 12 ەش هەوڵەکان بەردەوامن.

ڕاگەیێنراوی فەرمی: دوێنێ ئێوارە وەزارەتی دارایی لە ڕاگەیێنراوێکدا ڕایگەیاند: زۆربەی کێشە هونەرییەکانی لیستی مووچە چارەسەرکراون و تیمێکمان لە بەغدایە بۆ چارەسەرکردنی کێشەی گواستنەوەی پارە.

 

لێدوانی فەرمی: ڕێباز حەملان، بریکاری وەزارەتی دارایی عێراق بە ئاڤا نیوزی ڕاگەیاند: بڕیارە ڕۆژی چوارشەممە 11-12-2024 نزیکەی 758 ملیار دیناری مووچەی مووچەخۆرانی هەرێمی کوردستان بۆ مانگی 11 بنێردرێت.

 

لەلایەکی دیکەوە: ئەمڕۆش وەزارەتی دارایی و ئابووریی هەرێمی کوردستان لە ڕاگەیێنراوێکدا ڕایگەیاند، کێشەی گواستنەوەی پارە لە تەرخانکراوەکانی پشکی هەرێمی کوردستان بۆ زیادکردنی بڕی تەرخانکراو بۆ مووچە چارەسەر کراوە. بڕیارە بۆ پڕکردنەوەی کورتهێنانی مانگەکانی 10و 11 بڕی 430 ملیار دیناری دیکە خەرج بکرێت.