مەسرور بارزانی: کار بۆ گەڕاندنەوەی کەرکووک و شنگال دەکەین

ئاڤا نیوز

مەسرور بارزانی جێگری سەرۆکی پارتی دووپاتی کردەوە، بست بە بستی خاکی کوردستان هەست و ڕۆحی ئێمە و بەشێکن لە جەستەی ئێمە، ئەوەی لە تواناماندا بێت دەبێت بیكەین بۆ گەڕاندنەوەی ناوچە کوردستانییەکان بۆ نیشتمانی كوردستانمان.

چیرۆکی سەرەکی: ئەمڕۆ پێنجشەممە 16-10-2025، بە ئامادەبوونی مەسرور بارزانی، جێگری سەرۆکی پارتی، لە کەرنەڤاڵێکی جەماوەری گەورە لە شاری هەولێر پارتی ئاهەنگی ناساندنی کاندیدەکانی بۆ هەڵبژاردنی پەرلەمانی عێراق ڕێکخست.

لێدوانی فەرمی: مەسرور بارزانی، جێگری سەرۆکی پارتی دیموکراتی کوردستان گوتی: ئەركی ئێمە قورسە، هێشتا زۆرمان ماوە، كێشەمان تەنیا مووچە نییە، كێشەمان خاك، ناسنامە، دادپەروەری، یەكسانی و هەموو ئەو مافانەیە كە تاكوو ئێستا بەدەست نەهاتوون، ئێمە داواتان لێ دەكەین متمانەمان پێ بكەن بۆ ئەوەی بتوانین ئێمە لەسەر هەموو ئەو خاڵانە بەردەوام بین تاكوو گەیشتن بە ئامانجە كۆتاییەكانمان.

زانیاریی زیاتر: مەسرور بارزانی دووپاتی کردەوە: كەركووك، مەخموور، شنگال، بست بە بستی ئەم خاكە هیچیان بە لای ئێمەوە بەشێك نین لە جوگرافیا، ئەوانە هەست و رۆحی ئێمەن، بەشێكن لە جەستەی ئێمە، لەبەر ئەوە ئەوەی لە تواناماندا بێت دەبێ بیكەین بۆ گەڕاندنەوەی بست بە بستی ئەم خاكە پیرۆزە بۆ نیشتمانی كوردستانمان.

مەسرور بارزانی، جێگری سەرۆکی پارتی ئەمانەشی گوت:

٠ ئێمە قبووڵمان كردووە لە عێراقێكی فیدراڵیدا بژین، بەڵام عێراقێكی فیدراڵی كە بڕوای بە فیدراڵیەت و هەموو مافەكانی دەستووریی ئەم وڵاتە هەیە.

٠ خەڵكی كوردستان مافەكانیان دیارە، خاكی كوردستان بست بە بستی بەشێكن لە جەستەی كوردستان، ناكرێ بە جۆرێك مامەڵە لەگەڵ دەستوور بكرێ كە لە بەرژەوەندیی لایەنێك بێ و دژی هەرێمی كوردستان بێ.

٠ ئێمە پێویستە ئەو شەڕە لە بەغدا بكەین بۆ ئەوەی دەستوور وەكو خۆی جێبەجێ بكرێ، بۆ ئەوەی ماددەی 140 وەكو خۆی جێبەجێ بكرێ، بودجەی کوردستان وەكو خۆی جێبەجێ بكرێ و هەموو مافەكانی خەڵكی كوردستان وەكو خۆی دەستەبەر بكرێن.