عێراق یاداشتێکی لێکتێگەیشتنی نێودەوڵەتی بۆ خێراکردنی گەڕانەوەی ئاوارەکان واژۆ دەکات

ئاڤا نیوز

وەزارەتی کار و کاروباری کۆمەڵایەتی عێراق یاداشتێکی لێکتێگەیشتنی لەگەڵ ڕێکخراوی نێودەوڵەتی کۆچ (IOM) واژۆ کرد، بە ئامانجی خێراکردنی گەڕانەوەی ئاوارەکان بۆ ناوچەکانی خۆیان و دڵنیابوون لە تێکەڵکردنەوەیان بە کۆمەڵگە.

وێنە گەورەکە: سەدان خێزانی عێراقی هێشتا بەهۆی خراپیی بارودۆخی ناوچە ڕەسەنەکانیان، ناسەقامگیری و لەدەستدانی سەرچاوەکانی بژێوی و زۆرێک لە خزمەتگوزارییە سەرەکییەکان، لە کەمپەکانی ئاوارەیدا دەژین و ئامادە نین بگەڕێنەوە، ئەمەش دوای کۆنترۆڵکردنی مووسڵ و ناوچەکانی ڕۆژئاوای وڵات لەلایەن داعش لە ساڵی 2014 و تەنانەت دوای شکستپێهێنانی ڕێکخراوەکەش لە ساڵی 2017.

لێدوانی فەرمی: حەسەن خەوام، وتەبێژی وەزارەتەکە بە ڕۆژنامەی "سەباح"ـی ڕایگەیاند "یاداشتەکە بۆ بەهێزکردنی هاریکارییە بۆ چارەسەرکردنی پرسی ئاوارەبوون، کە ڕووبەڕووی ئاستەنگە ئەمنی و کۆمەڵایەتی و هونەرییەکان دەبێتەوە، جگە لە کەمیی خزمەتگوزارییە سەرەکییەکان لە ناوچە ئازادکراوەکاندا".

زانیاریی زیاتر: بە وتەی خەوام، ئەوانەی دەگەڕێنەوە، لە چەندین ڕووەوە هاوکاری دەکرێن، وەک: هاوکاریی کۆمەڵایەتی، قەرزی ئاسان، پڕۆگرامی ڕاهێنانی پیشەیی و دەستبەرکردنی بیمەی کۆمەڵایەتی، "بەمەش دڵنیایی دەدرێت لە تێکەڵکردنەوەی تەواوی ئاوارەکان لە کۆمەڵگەدا و بەهێزکردنی سەقامگیریی کۆمەڵگە خۆجێییەکان".

لەهەمان کاتدا: خەوام دووپاتی کردەوە کە "یاداشتە نوێیەکە یارمەتیدەر دەبێت لە فراوانکردنی بوارەکانی هاریکاری لەگەڵ ڕێکخراوی نێودەوڵەتی کۆچ و خێراکردنی کۆتاییهێنان بە پرسی ئاوارەبوون بە باشترین شێوە، بەجۆرێک کە خزمەت بە سەقامگیری و گەشەپێدانی خۆجێیی بکات".