پنتاگۆن بۆ ئاڤا: 900 سەربازمان لە ڕۆژئاوای کوردستان هەیە و ناکشێینەوە

ئاڤا نیوز 

وەزارەتی بەرگریی ئەمریکا (پنتاگۆن) ڕایگەیاند، بەردەوام دەبن لە بەرەنگاربوونەوەی چەکدارانی داعش لە ڕۆژئاوای کوردستان و هێزەکانیان ناکشێننەوە.

 

وێنە گەورەکە: دوای ڕووخانی دەسەڵاتی بەشار ئەسەد، دۆخی سووریا و ڕۆژئاوای کوردستان بەرەو هێوربوونەوە دەچێت و هاووڵاتیان دەگەڕێنەوە ناوچەکانیان.

 

لێدوانی فەرمی: تۆم کرۆسن وتەبێژی وەزارەتی بەرگریی ئەمریکا (پنتاگۆن) بە ئاڤا نیوزی رایگەیاند، لە ئێستادا 900 سەربازی ئەمریکی لە سووریا هەن، و لەم دواییانەدا هیچ گۆڕانکارییەک لە ژمارەی سەربازەکانیان لە ڕۆژئاوای کوردستان نەکراوە. 

 

ئاماژەی بەوەشکرد، ماوەیەکە هەڵوێستی وڵاتەکەیان لە سووریا جێگیرە و ئەرکی ڕاستەوخۆی هێزەکانمان تێکشکاندنی داعشە لە ناوچەکە.

 

لەلایەکی دیکەوە: جۆ بایدن، سەرۆکی ئەمریکا ڕایگەیاند، بەردەوام دەبین لە پاڵپشتیکردن و هاوکاریکردنی ئەو هێزانەی لە ناوچەکە کاردەکەن بۆ تێکشکاندنی داعش.

 

زانیاری زیاتر: لە 22-09-2014 بە بڕیاری باراک ئۆباما سەرۆکی پێشووتری ئەمریکا، هێزەکانی ئەمریکا دەستیان بە چالاکییەکانیان لە ناو خاکی سووریا دژ بە چەکدارانی داعش کرد و تائێستاش بەردەوامن.