سەرۆک بارزانی: ئافرەتان جێ پەنجەیان لە خەباتی ڕزگاریخوازی گەلی كوردستان هەمیشە دیارە

ئاڤا میدیا

 

سەرۆک بارزانی بە بۆنەی 72مین ساڵیادی دامەزراندنی یەکێتی ئافرەتانی کوردستان، پەیامێکی پیرۆزبایی ئاراستەی ئافرەتانی کوردستان دەکات.

وێنە گەورەکە: ڕۆژی چوارشەممە 11-12-2024، ساڵیادی دامەزراندنی یەکێتی ئافرەتانی کوردستانە و بەو بۆنەیەشەوە سەرۆک بارزانی پەیامێک ئاراستەی سەرجەم ئافرەتانی کوردستان دەکات.

 

پەیامی سەرۆک بارزانی لەبارەی ساڵیادی دامەزراندنی یەکێتیی ئافرەتان:

یه‌کێتیی ئافره‌تانی کوردستان یەكێكە لە دەستكەوتە گرنگەكانی شۆڕشی مەزنی ئەیلوول، لە هەمانكاتیشدا ئەزموونێكی سەركەوتووی بەشداریی ئافرەت لە ژیانی سیاسی و كۆمەڵایەتیی كوردستان بووە. 

 

ئەوەی پێویستە بیزانیت: یەكێتیی ئافرەتانی كوردستان رێکخراوێکی تێکۆشه‌ری ناو شۆڕش و خەباتی گەلی كوردستانە كە ڕۆڵی خۆی لە بڵاوكردنەوەی هۆشیاری و پێگەیاندنی ئافرەتان و بەرگریكردن لە مافەكانیان زۆر بە باشی بەجێ گەیاندووە و جێی پەنجەیان لە خەباتی ڕزگاریخوازی گەلی كوردستان هەمیشە دیارە.

 

سەرۆک بارزانی ئەوەشی وت: ئەو چاوەڕوانییە لە یەكێتیی ئافرەتانی كوردستان هەیە كە لە قۆناغەكانی داهاتووی ژیانی گەلەكەماندا لە چوارچێوەی كولتووری پێكەوەژیان و مەدەنییەت، یەكسانی و نەهێشتنی توندوتیژیی خێزانی و كۆمەڵایەتی كار بۆ بەهێزكردنی هەستی نیشتیمانپەروەری لەنێو ڕیزەكانیاندا بكەن.

 

ئەمەش بزانە: یەکێتیی ئافرەتانی کوردستان ڕێکخراوێکی مرۆییە لە بواری ئافرەتان کار دەکات، مەبەست لە دامەزراندنی ڕێکخراوەکە کۆکردنەوە و ڕێکخستنی تواناکانی ئافرەتان بووە بۆ بەشداریکردنیان لە شۆرشی ئەیلوول، هاوکات پایە ڕامیاری و کۆمەڵایەتییەکان.