زیاتر لە پێنج هەزار قوتابی زانکۆ تایبەتەکان ناویان ڕانەگەیێنراوە

ئاڤا نیوز

 

سەدان قوتابی دەرچووی پۆڵی 12ی ئامادەیی کە خۆیان لە زانکۆ و پەیمانگە ئەهلییەکان ناونووسکردووە لە ڕێگەی ئاڤا میدیاوە داوایەک لە وەزارەتی خوێندنی باڵای حکومەتی هەرێمی کوردستان دەکەن.

 

چیرۆکی سەرەکی: لە کاتێکدا ناوی قوتابیانی وەرگیراو لە زانکۆ و پەیمانگە حکومییەکان زیاتر لە مانگێکە گەڕاوەتەوە و خوێندن دەستی پێکردووە، بەڵام تاوەکو ئێستا ناوی زیاتر لە پێنج هەزار قوتابیانی زانکۆ و پەیمانگە تایبەتەکان ڕانەگەیێنراوە.

 

لێدوانی فەرمی: سەرچاوەیەک لە وەزارەتی خویندنی باڵا بە ئاڤا نیوزی ڕاگەیاند: لە ئایندەیەکی نزیکدا ناوی قوتابییەکان ڕادەگەیێنرێت، هاوکات درەنگ کەوتنمان لە ڕاگەیاندنی ناوەکانیان بەهۆی نووسراوێکی چاودێری دارایی بوو کە ڕێگری لە مامۆستایانی زانکۆ و پەیمانگە حکومییەکان دەکرد لەوەی وانە لە زانکۆ ئەهلییەکان بڵێنەوە.

 

ئەوەی پێویستە بیزانیت: زیاتر لە پێنج هەزار قوتابی لە زانکۆ و پەیمانگە تایبەتەکان ناوەکان ڕانەگەیێنراوە و نەچوونەتە نێو پرۆسەی خوێندنەوە، هاوکات 25ی ئەم مانگە تاوەکو 2ی مانگی داهاتوو پشووی سەری ساڵ دەبێت و قوتابیانی زانکۆ و پەیمانگە تایبەتەکان لە وەرزێکی خوێندن بێبەش دەبن، ئەمە لەکاتێکدایە زانکۆ و پەیمانگە ئەهلییەکان کرێی خوێندنی ئەمساڵ بە تەواوی لە قوتابیان وەردەگرن، کەچی تەنیا وەرزێکی خوێندن وانەیان پێدەدەرێت.

 

زانیاریی تایبەت: ئاڤا میدیا لە بەدواداچوونێکدا زانیویەتی، زیاتر لە مانگێکە د. ئارام محەممەد، وەزیری خویندنی باڵا نەچووەتە سەر کارەکەی لە وەزارەت.