بۆ ئەمساڵ پشکنینی تەندروستی و بیر و هۆش بۆ حاجیان دەکرێت

ئاڤا نیوز

 

جیاواز لە ساڵانی ڕابردوو، بۆ ئەمساڵ پشکنینی شیاوی بیر و هۆش و دەروونی بۆ ئەو کەسانە دەکرێت، کە بەنیازن فەریزەی حەج بەجێ بگەیەنن، بەڕێوەبەری گشتیی حەج و عەمرەی هەرێمی کوردستان لەوبارەیەوە دەڵێت "لیژنەی پشکنین پێکدەهێنین'".

 

وێنە گەورەکە: سعوودیە بۆ دەربازبوون لەو لۆد و فشارانەی ساڵانە لەسەر نەخۆشخانە و ناوەندەکانی چارەسەری دروست دەبێت، ئەمساڵ ڕێنمایی بۆ هەموو وڵاتانی جیهان ناردووە، کە پشکنینی شیاو بۆ هەر کەسێک بکرێت، کە نیازی بەجێگەیاندنی فەریزەی حەجی هەیە.

 

لێدوانی فەرمی: شێخ نیاز نەقشبەندی، بەڕێوەبەری گشتیی حەج و عەمرەی هەرێمی کوردستان، بە ئاڤا نیوزی ڕاگەیاند: بەغدا ڕێنماییەکەی سعوودیەی بۆ ناردووین، ئێمە لەگەڵ وەزارەتی تەندروستی بۆ پێکهێنانی لیژنە لەسەر هێڵین، بۆ ئەوەی لە سەرجەم ناوچەکان پشکنینی شیاو بۆ ئەو کەسانە بکرێت.

 

بەڕێوەبەری گشتیی حەج و عەمرە ئەوەشی گوت: پشکنینی شیاوی بیر و هۆش و دەروونی، لە بەرژەوەندی ئەو کەسانەیە کە دەیانەوێ فەریزەی حەج بەجێ بگەیەن.

 

زانیاریی زیاتر: ئەمساڵ پێنج هەزار و 190 هاووڵاتی هەرێمی کوردستان، دەتوانن فەریزەی حەج بەجێ بگەیەنن.

 

ئەوەی پێویستە بیزانیت: لە ناوەڕاستی مانگی پێنجی ساڵی 2025، یەکەم کاروانی حاجیانی هەرێمی کوردستان بۆ سعوودیە بەڕێ دەکەوێت.

 

ئەمەش بزانە: وەزارەتی حەجی سعوودیە ڤیزەی حەج بەو کەسانە نادات، کە لەگەڵ پاسپۆرتەکانیان پشکنینی شیاوی تەندروستی و بیر و هۆش و دەروونی نەبێت.