ئاڤا بەدواداچوون بۆ نەبەستنی مووچەی هەزاران زیندانی سیاسی دەکات

ئاڤا نیوز

دوای ئەوەی لە ئاڤا نیوز کێشەی زیندانییەکی سیاسیی بڵاوکرایەوە، وەزارەتی کاروباری شەهیدان و ئەنفالکراوان بەدواداچوونی بۆ کردووە، دەڵێن "ناو و کۆدی ئەو زیندانییە سیاسییە هەیە و کێشەی نییە". هەر ئەم کەسە نییە و هەزاران زیندانی سیاسی دیکەن تاوەکو ئێستا مووچەیان بۆ نەبەستراوە.
 
چیرۆکی سەرەکی: حوسێن عەلی محەممەد ئەحمەد، بە ڕەسەن خەڵکی پارێزگای هەڵەبجەیە، لە ساڵانی 1982 بۆ 1983 لە زیندانی تۆپزاوە لە باشووری کەرکووک لەگەڵ ژمارەیەک خەڵکی سنوورەکە بۆ ماوەی شەش مانگ بەندکراون، دوای ئەشکەنجەیەکی زۆر ئازادکراون، ئەوەبوو محەممەد وارسی ئەو زیندانییە سیاسییە لە ئاڤا نیوزەوە داوای گەڕاندنەوەی مافەکانی کرد.

 

لێدوانی فەرمی: سەرچاوەیەک لە بەڕێوەبەرایەتیی گشتیی زیندانییە سیاسییەکانی سەر بە وەزارەتی کاروباری شەهیدان و ئەنفالکراوان بە ئاڤا نیوزی ڕاگەیاند: حسێن عەلی محەممەد لە وەجبەی 12ی زیندانە سیاسییەکانە، کۆدەکەی 17 هەزار و 757ە و هیچ کێشەیەکی نییە.

 

زانیاریی زیاتر: وەجبەی یەک تاوەکو هەشتی زیندانییە سیاسییەکان مووچەیان بۆ بەستراوە، بەڵام وەجبەی نۆ تاوەکو 15 هێشتا مووچەیان نەبەستراوە.

 

زانیاریی بەدەستهاتوو: ئێستا وەجبەی نۆیی زیندانیانی سیاسی لەلایەن دادوەرانەوە پێداچوونەوەیان بۆ دەکرێت، بۆ ئەوەی پەسەند بکرێت و مووچەیان بۆ ببەسترێت، (حسێن عەلی محەممەد) لە وەجبەی 12یە و سێ قۆناغی لەپێشە بۆ ئەوەی جارێکی دیکە پێداچوونەوەی بۆ بکرێتەوە. 

 

لەلایەکی دیکەوە: ئەحمەد ڕەسوڵ، بەڕێوەبەری گشتیی خزمەتگوزاری کەسوکاری شەهیدان و زیندانیانی سیاسیی بە ئاڤا نیوزی ڕاگەیاند: وەجبەی 9 تاوەکو 15ی گیراوان و زیندانیانی سیاسی پەسەند کراون و دادوەریان بینیوە و ڕێکارەکانیان تەواو کراوە، ئەو پێداچوونەوەی ئێستا دەکرێت هیچ لە بابەتەکە ناگۆڕێت، چونکە سەرجەم ڕێکارە یاسایی و ژمێریارییەکانیان تەواو بووە، بەهۆی قەیرانی داراییەوە مووچەی مانگانەیان بۆ نەبەستراوە.

 

ژمارەکان وادەڵێن: 15 وەجبەی زیندانیانی سیاسیی هەیە، لە 25 هەزار و 807 کەس پێکهاتووە و پشتڕاستکراونەتەوە.