هەرێمی کوردستان لە بەرامبەر کڕینی مووڵک مافی مانەوە بە بیانییەکان دەدات

ئاڤا نیوز

 

هاووڵاتیانی بیانی دەتوانن لە هەرێمی کوردستان مافی مانەوە وەربگرن و هەر بیانییەک بە کڕینی یەکەیەکی نیشتەجێبوون مافی مانەوەی پێدەدرێت.

 

وێنە گەورەکە: حکومەتی هەرێمی کوردستان دەیەوێت بازاڕی خانووبەرە زیاتر ببووژینێتەوە، لەم چوارچێوەیەدا بە کڕینی یەکەیەکی نیشتەجێبوون مافی مانەوە بە خەڵکی بیانی دەدرێت.

 

لێدوانی فەرمی: بەرگەشت ئاکرەیی، گوتەبێژی دەستەی وەبەرهێنان بە ئاڤا میدیا ڕاگەیاند: "هەر بیانییەک بێتە هەرێمی کوردستان و بیەوێت مافی مانەوەی پێبدرێت، دەتوانێت یەکەیەکی نیشتەجێبوون بکڕێت و داوای مافی مانەوە بکات".

ئەوەی پێویستە بیزانیت: سەرمایەدار و وەبەرهێنەر و بیانییەکان، بەکڕینی یەکەی نیشتەجێبوون یان ڤێڵایەک کە نرخەکەی لە 50 هەزار دۆلار زیاتر بێت، دەتوانن مافی مانەوە بۆ ماوەی پێنج ساڵ لە هەرێمی کوردستان وەربگرن، دوای ئەو ماوەیەش دەتوانن نوێی بکەنەوە.

ئەمەش بزانە: ڕێککارە ئیدارییەکان دەستیان پێکردووە و لە ساڵی داهاتووەوە لەمیانەی کابینەی دەیەمی حکومەتی هەرێمی کوردستان بڕیارەکە جێبەجی دەکرێت.