لە ساڵ و نیوێکدا 13 هەزار سەگی بێلانە بردراونەتە شێڵتەری هەولێر

ئاڤا نیوز

 

پرۆسەی کۆکردنەوەی سەگی بێلانە لە شێڵتەرەکان بەردەوامە و تائێستاش 13 هەزار سەگ بردراونەتە شێڵتەری هەولێر.

 

وێنە گەورەکە: نزیکەی ساڵ و نیوێکە پرۆسەی کۆکردنەوەی ئاژەڵی بێڵانە دەستیپێکردووە، ئەمەش وایکردووە حاڵەتەکانی گەستن و پەلاماردانی لە سنووری هەولێر 47٪ کەم بکات، هەر لەو ماوەیەشدا نزیکەی 13 هەزار سەگی بێڵانە کۆکراونەتەوە و چارەسەریان وەرگرتووە.

 

لێدوانی فەرمی: ژیار جەلال، بەڕێوەبەری خزمەتگوزاری و ژینگەپارێزی لە هەولێر بە ئاڤا میدیای ڕاگەیاند: نزیکەی شەش هەزار سەگی بێڵانە لە شێڵتەر لە هەولێر هەن، لە ساڵی داهاتووشدا بە دوو ئامێری نوێ بەردەوام دەبین لە کۆکردنەوەیان، هاوکات ئەو سەگانە نەشتەرگەریان بۆ دەکرێت و ڤاکسین دەکرێن، دواتر بەپێی پلانێکی تایبەت ئازاد دەکرین.

 

زانیاریی زیاتر: بەردەوام سەگی بێڵانە لە شێڵتەری هەولێر کۆدەکرێنەوە، هاوکات ڕۆژانە نزیکەی 15 سەگ نەشتەرگەریی نەزۆکیان بۆ دەکرێت.

 

ئەوەی پێویستە بیزانیت: لە ماوەی دوو مانگی ڕابردوو 92 حاڵەتی گەستنی سەگ لە نەخۆشخانەی فریاکەوتنی هەولێر تۆمار کراوە، هاوکات حاڵەتەکانی پەلاماردان بەراورد بە مانگەکانی پێشووتر بەڕێژەیەکی بەرچاو کەمیکردووە.

 

ئەمەش بزانە: لە شێڵتەری سنووری سلێمانی نزیکەی هەزار سەگ کۆکراونەتەوە، لە دهۆکیش کارەکانی تەواوکردنی شەڵتەری کۆکردنەوەی سەگ بەرەو کۆتایی دەڕوات.