مەزڵووم عەبدی دوو بەڵێن بە ئەنەکەسە دەدات

ئاڤا نیوز

 

کۆبوونەوەکانی نێوان هەسەدە و ئەنەکەسە لە ڕۆژئاوای کوردستان ئەرێنی بووە و ئەنەکەسە داوایکردووە هەسەدە پەیوەندییەکانی لەگەڵ پەکەکە بپچڕێنێت.

 

وێنە گەورەکە: دوای ڕووخانی دەسەڵاتی بەشار ئەسەد و پێکهێنانی حکومەتی نوێی سووریا، یەکەمجارە مەزڵووم عەبدی، فەرماندەی گشتیی هێزەكانی سووریای دیموكرات 'هەسەد' و سەرۆكایەتیی ئەنجوومەنی نیشتمانیی كورد لە سووریا لەسەر بارودۆخی وڵاتەکە کۆببنەوە.

 

لێدوانی فەرمی: سلێمان ئۆسۆ، سەرۆکی ئەنەکەسە بە ئاڤا میدیای ڕاگەیاند: کۆبوونەوەکانمان لەگەڵ هەسەدە ئەرێنی بوون، داوامان کردووە پەیوەندییەکان لەگەڵ پەکەکە بپچڕێنرێن، چونکە هەبوونی پەکەکە بووەتە کێشە بۆ ناوچەکەمان و ئەگەری دووبارە دروستکردنەوەی کێشەیە، بۆیە خەڵکی سووریا پەکەکە ڕەت دەکەنەوە.

 

بۆچوونی بەرامبەر: مەزڵووم عەبدی، فەرماندەی هێزەکانی سووریای دیموکرات بە نوێنەرانی ئەنەکەسەی گوتووە: ئامادەین چەکدارانی پەکەکە لە سووریا ببەینە دەرەوە.

 

بۆچی گرنگە: هەردوولا جەختیان لە یەکڕیزی کورد و هەڵوێستی هاوبەش لە بەرامبەر دیمەشق کردووەتەوە، هاوکات مەزڵوم عەبدی بەڵێنی داوە چیتر پێشێلکاری بەرامبەر ئەنەسەکە نەکرێت.