هەسەدە کوژرانی 17 چەکداری لە نزیک بەنداوی تشرین ڕاگەیاند

ئاڤا نیوز

 

هێزەکانی سووریای دیموکرات رایگەیاند، لە نزیک بەنداوی تشرین 17 چەکداری گرووپە چەکدارەکانی نزیک لە تورکیایان کوشتووە و 40 چەکداری دیکەشیان بریندار کردووە.

 

وێنە گەورەکە: لە دوای کەوتنی دەسەڵاتی بەشار ئەسەد، لە 8ی دیسەمبەرەوە، ماوەی 20 ڕۆژە ڕووبەڕووبوونەوە لەنێوان گرووپە چەکدارەکانی نزیک لە تورکیا و هێزەکانی هەسەدە لە منبیج و بەنداوی تشرین بەردەوامە.

 

ڕاگەیێنراوی فەرمی: هەسەدە سەبارەت بە ڕووبەڕووبوونەوەیان لەگەڵ گرووپە چەکدارەکان باسی لەم چەند خاڵە کردووە:

 

یەکەم- لە ناوچەکانی باکوور و رۆژهەڵاتی سووریا هێرشی گەورەیان بۆ سەر گرووپە چەکدارەکانی نزیک لە تورکیا ئەنجامداوە.

 

دووەم- توانیویانە چوار ئۆتۆمبێل و کۆمەڵێک چەک و کەرستەی دیکەی جەنگی لەناوببەن.

 

سێیەم- 17 چەکداری ئەو گرووپانەیان کوشتووە و 40 چەکداری دیکەشیان بریندارکردووە.

 

چوارەم- یەکێک لەوانەی کوژراوە فەرماندەیەک بووە بەناوی ئەبو فایز.

 

پێنجەم- تەنها یەک برینداری سووکمان هەیە لەناو هێزەکانمان.

 

باکگراوند: لە ئێوارەی ڕۆژی هەینییەوە شەڕ و پێکدادانی سەخت لەنێوان هێزەکانی هەسەدە و گرووپە چەکدارەکانی نزیک لە تورکیا لە ناوچەکانی ئەبو قەلقەل و عەلوش لە ناوچەکانی باکوور و رۆژهەڵاتی سووریا لە دەورووبەری بەنداوی تشرین بەردەوامە.