چیرۆکی چوون و هاتنی ئۆتۆمبێلەکانی تایبەت بە گواستنەوەی پارە

ئاڤا نیوز

 

ئاڤا زانیویەتی ئەو ئۆتۆمبێلانەی ئەمڕۆ لە ڕێگەی نێوان هەولێر و بەغدا بینران، پارەیان بۆ مووچە نەهێناوە و تەنانەت بەتاڵ بوونە و هیچ بڕە پارەیەکیان تێدا نەبووە، بەڵکو هاتوون لە هەولێر پارە بۆ دوو پارێزگای دیکە ببەن.

چیرۆکی سەرەکی: ئەمڕۆ هەشت ئۆتۆمبێلی گواستنەوەی پارە لە ڕێگەی نێوان بەغدا - هەولێر بینران، ئەمەش تا ڕادەیەک بۆ مووچەخۆرانی هەرێمی کوردستان دڵخۆشکەر بوو، لە تۆڕە کۆمەڵایەتییەکان قسەی جیاوازی لەسەر کرا و خەڵک ئومێدی ئەوەیان هەبوو پارەیان بۆ مووچە هێنابێت.

زانیاریی تایبەت: ئاڤا بەدواداچوونی کرد، دەرکەوت ئەم ئۆتۆمبێلانە هیچ بڕە پارەیەکیان تێدا نەبووە، هاتنیان بۆ ئەوە بووە  لە بانکی ناوەندیی عێراق - لقی هەولێر پارە بۆ مووچەی مووچەخۆرانی عێراق بۆ هەردوو پارێزگای نەینەوا و کەرکووک بگوازنەوە.

 

باکگراوند: پێشتر حکومەتی هەرێمی کوردستان داوای لە حکومەتی عێراق کردبوو، جیاوازی لە نێوان مووچەخۆرانی عێراق و هەرێمی کوردستان نەکرێت و هەمووان بە یەک چاو سەیر بکرێن، دواتر دادگای فیدرالیش کردییە بڕیار لە زاخۆوە تاوەکو بەسرە نابێت جیاوازی لەنێوان مووچەخۆراندا بکرێت، بەڵام تائێستا ئەو جیاوزییە دەکرێت و بە بەرچاوی خەڵکی کوردستان پارە بۆ مووچەی فەرمانبەرانی عێراق دەڕوات و فەرمانبەرانی هەرێمی کوردستانیش تاوەکو ئێستا تەنیا مووچەی مانگی 10ـیان وەرگرتووە. لەکاتێکدا لە عێراق مووچەی مانگی 12 دابەش دەکرێت.