سەنتەری ڤیزای چین لە هەولێر کرایەوە

ئاڤا نیوز 

 

کونسوڵخانەی چین لە هەولێر سەنتەری ڤیزای بۆ هاونیشتمانیانی کوردستان کردەوە؛ هاونیشتمانیان لە وادەیەکی کورت ڤیزە وەردەگرن و دەتوانن ڕاستەوخۆ لە هەولێرەوە بچنە چین. 

 

بۆچی گرنگە: پێش کردنەوەی سەنتەری ڤیزای چینی لە هەولێر تێچووی وەرگرتنی ڤیزای چین بە لایەنی كەمەوە 500 دۆلاری ئەمریكیی بوو، ئێستا هاونیشتمانیان بە 38 دۆلار دەتوانن ڤیزا وەرگرن.

 

ئەوەی پێویستە بیزانیت: ئەمڕۆ چوارشەممە سەنتەری ڤیزای چین لە هەولێر کرایەوە و هاونیشتمانیان دەتوانن لە سبەیەوە مامەڵەی وەرگرتنی بکەن. 

 

لێدوانی فەرمی: لیو جون، كونسوڵی گشتیی چین لە هەولێر لە وەڵامی پرسیارێکی کوردستان حەسەن، پەیامنێری دیپلۆماسی ئاڤا نیوز گوتی: کوردستان، هەرێمێکی ئارام و سەقامگیرو گرنگە بۆ چین، حەوت کۆمپانیای گەورەی چینی لە هەرێمی کوردستان وەبەرهێنان دەکەن دەمانەوێ ئەو ژمارەیە زیادبکەین.

 

زانیاریی زیاتر: مامەڵەی وەرگرتنی ڤیزای چین ڕۆژانی دووشەممە، چوارشەممە و پێنجشەممە دەبێت، لە ماوەی دوو بۆ چوار ڕۆژ هاونیشتمانیان ڤیزاکەیان وەردەگرنەوە.