داوا دەکرێت ئۆتۆمبێلی کارەبایی لە باجی گومرگری ببەخشرێت

ئاڤا نیوز

 

دەستەی ژینەگەی هەرێمی کوردستان داوای بەخشینی باجی گومرگی لەسەر ئۆتۆمبێلی کارەبایی دەکات، وتەبێژی دەستەی ژینگەش لەمبارەیەوە دەڵێت، "بۆ ئەم مەبەستە نووسراومان ئاراستەی وەزارەتی ناوخۆ کردووە".

 

وێنە گەورەکە: ئۆتۆمبێلی کارەبایی بۆ پاک ڕاگرتنی ژینگە و ڕووبەڕووبوونەوەی گۆڕانکاریی کەشوهەوا دروست کراوە. ئەو ئۆتۆمبێلانە هاوشێوەی ئەو ئۆتۆمبێلانەی بە گازوایل و بەنزین کار دەکەن، ڕوسوماتی  ژینگەیان لێ وەردەگیرێت، ئێستاش کار بۆ لابردنی ئەو باجانە دەکرێت، تا نزخی ئۆتۆمبێلەکان هەرزانتر ببن و خەڵکی زیاتر بەکاری بهێنن.

 

لێدوانی فەرمی: عەبدولڕەزاق خێلانی، وتەبێژی دەستەی ژینگەی هەرێمی کوردستان بە ئاڤا میدیای ڕاگەیاند: دوو نووسراو بۆ بەخشینی گومرگ و باج و بەخشینی مامەڵەی ژمارەی ئۆتۆمبێلی کارەبایی ئاراستەی وەزارەتی ناوخۆی حکومەتی هەرێمی کوردستان کراوە.

 

وتەبێژی دەستەی ژینگە گوتیشی: بەخشینی ئۆتۆمبێلی کارەبایی لە باجی گومرگی خراوەتە بواری جێبەجێکردنەوە.

 

زانیاریی زیاتر: ئۆتۆمبێلی کارەبایی هاوشێوەی ئەو ئۆتۆمبێلانەی بە بەنزین و گازوایل کار دەکەن، لە بەڕێوەبەرایەتی هاتووچۆکان تۆمار دەکرێن.

 

زانیاریی بەدەستهاتوو: کاتێک ئۆتۆمبێلێک مامەڵەی ژمارەکردن دەکات، بەشێوەیەکی گشتیی بڕی یەک ملیۆن و 540 هەزار دیناری لێ وەردەگیرێت، لەم بڕەش 274 هەزار دینار پارە ( ڕسومات) ژینگە و ڕێگاوبانی لێ وەردەگیرێت.